CVIRAA IKAUPAT
VIGAN CITY, ILOCOS SUR – Nahibalik ang Central Visayas Regional Athletic Association (CVIRAA) sa naandan niing ikaupat nga puwesto sa 2018 Palarong Pambansa nga ningtiklop kagahapon sa Quirino Stadium sa Ilocos Sur.
Ang Rehiyon 7 nakakolekta og 26 ka gold medals, 25 ka mga silver ug 36 ka mga bronze aron isaka ang ilang nakab-ot gikan sa ikasiyam nga luna sa miaging tuig, labing ubos alang sa CVIRAA.
Sama sa naandan, ang National Capital Region (NCR) ningdominar na sab sa matag tuig nga kompetisyon pinaagi sa ilang 100-70-50 gold-silverbronze medal tally.
Nahimutang sa ikaduhang luna ang Region IV-A nga adunay 55-50-73 tally unya ikatulo ang Region VI nga adunay 46-45-55 nga tally.
Ang labing sikit nga karibal sa CVIRAA nga mao ang Cordillera Administrative Region (CAR) naa sa ikalima dala ang 25-22-23 tally. Usa ra ka gold
medal ang deperensya sa CVIRAA ug CAR.
Ang boksidor nga si Jerwin Asilo sa Bohol Province mao ang nagsilbeng katapusang
hunat alang sa CVIRAA dihang nakalangkat kini’g
gold medal sa bantamweight division.
Gilupig ni Asilo si Charles Con-El sa Region VI sa championship bout niadtong Biyernes sa Plaza Burgos. Ning tuiga, ang babayeng mga atleta mao ang nagsilbeng bida sa CVIRAA human kini nakahakot og 15 sa 20 ka gold medals nga mabira sa secondary division ug tulo sa unom ka gold medals sa elementary category.
Duha ka babayeng mga atleta ang ning-agak sa CVIRAA aron makaabot ning puwestuha. Gipangtumbok mao sila si Archer Phoebe Nicole Amisto ug Daniela Reggie Dela Pisa.
Si Amisto nakabaton og lima ka gold medals samtang upat ang nabira ni Dela Pisa sa rhythmic gymnastics.
Nakatabang sab og dako sa CVIRAA mao ang pagbalik sa Negros divisions, kansang mga atleta nakatunol og pito ka
gold medals gikan sa archery, elementary girls’ swimming ug wrestling alang sa rehiyon. Nahibalik ang Negros divisions sa CVIRAA ning tuiga human nabungkag ang Negros Island Region (NIR).
Ang mga atleta sa rehiyon 7 mingsubay og 20 ka mga adlaw nga unified training nga
gipundohan sa siyudad sa
Sugbo.
Si Cebu City Councilor Augustos Young, kinsa maoy chairman sa committee on education, nagkanayon nga wala siya nakadayeg sa resulta sa unified training.
Nagplano si Young nga sa sunod tuig, mas taas nga unified training ang ilang ipasunod sa mga atleta sa Rehiyon 7.
“We spent P3 million for the unified training, but I was not impressed with the result. I check the playing field and what I observed on our athletes was that they lacked stamina and practice,” matod ni Young sa interbyu sa Sun.Star Cebu.
Sa nanglabay nga katuigan, ang CVIRAA kanunay lang nahiluna sa ikaupat gawas lang niadtong 2015 diin napuwesto kini sa ikaunom ug sa miaging tuig.