TUBURAN, BANTAYAN 3-0 NA
Nagpadayon ang pag-arangkada sa Tuburan ug Bantayan sa North Division samtang wa usab kapugngi ang kainit sa Samboan ug Ginatilan sa pikas nga habig niadtong Sabado sa 2018 Cebu Governor’s Cup Basketball tournament.
Ang host Tuburan mikutlo sa ilang tulo ka sunodsunod nga daog pinaagi sa paglubong sa Asturias, 97-75, sa
Bracket 3, samtang ang Bogo mirehistro sa ilang unang daog sa tulo ka duwa, 86-67, batok sa Tabogon sa preliminary game.
Ang panagkumboya nila ni Mike Parilla ug Steven Yuson kinsa pulos milanit og tag 15 puntos matag usa maoy nahimong lig-ong puwersa sa Tuburan.
Samtang ang Bantayan mikutlo usab sa ilang ikatulo nga daog, 102-71, batok sa San Remegio sa Bracket 4 didto sa Maridejos Sports Complex.
Sa gihapon, si MC Ursal maoy nahimong topscorer sa Bantayan nga may 24 puntos, samtang ang laing mitali og
double-digit sa scoring mao sila si Samuel Escaran Jr. nga may 18 puntos, Alfredo Veliganio Jr. nga may 16 ug Renz Ortiz nga midugang og 12.
Si Mark Anthony Rodriguez nangulo sa pildirong Remegio nga may 15 puntos, Ken Rublica nga may 14 ug Brian Paquibot mitampo og 10.
Samtang sa laing duwa, ang Daanbantayan mikudlit usab sa ilang unang daog, 101-89, batok sa Santa Fe samtang gilubong usab sa Medridejos ang Medellin, 100-78,
Sa kasamtangan, ang Tuburan ug Bantayan maoy nag-una sa ilang tagsataga ka bracket ug didto sa South nagsawo usab sa liderato ang Samboan ug Ginatilan sa Bracket 3.
Ang Samboan mibuntog sa Alegria, 76-66, samtang gipatapsingan sa Samboan ang Oslob, 82-80.
Ang Samboan ug Ginatila pulos aduna nay 2-0 nga baraha ug maoy naguna sa Bracket 3.