3 SA CEBU LAKIP SA PDEA DRUGS WATCHLIST

PULOS KANHI MGA KAPITAN; TAGA DANAO, RONDA, TALISAY

Mokabat sa 90 ka mga barangay kapitan sa tibuok nasod ang nanganlan sa drug watchlist nga gipagawas sa Philippine Drug Enforcement Agency (PDEA) kagahapon.

Ang listahan dunay 207 ka mga ngan, nga gi-validate sa upat ka mga law enforcement

unit, matod ni PDEA Director Aaron Aquino.

Lakip sa nanganlan ang kanhi tulo ka mga barangay kapitan sa Sugbo, duha niini naa na sa laing mga posisyon samtang ang usa wa na sa katungdanan.

Ang mga ginganlan naglakip kanila ni Marc Ferdinand Bas, kanhi kapitan sa Barangay Lagtang, Talisay City; Ramonette Durano, kanhi kapitan sa Barangay Suba, Danao City, nga kanhi nahimong information officer sa maong siyudad; ug Bibiano Cabaron, kanhi kapitan sa Barangay Palanas, Ronda, nga karon naglingkod na pagka-konsehal sa lungsod.

Si Aquino niingon nga ilang pasakaan og mga kaso ang naa sa listahan.

REAKSYON

Ang labaw sa Cebu Provincial Anti Drug Abuse Office (CPADAO) nga si Ivy Meca, kinsa igsuon ni Ramonette, nagdumili pagkomentaryo sa isyu.

Nasayran gikan sa usa ka kasaligang tinubdan nga anaa na sa gawas sa nasud si Ramonette.

Gisuwayan pagkuha ang habig sa iyang amahan nga si Danao City Mayor Ramon “Nito” Durano III bahin sa isyu, apan wa motubag sa text ug tawag.

Samtang, nahadlok sa iyang seguridad si Cabaron ug sa iyang pamilya human ginganlan og apil.

Ang kanhi presidente sa Association of Barangay Council (ABC) sa lungsod nihimakak sa iyang kalambigitan sa kalihokan sa gidili nga drugas ug nagtuo nga pulitika ang hinungdan sa pagkaapil sa iyang pangan sa listahan sa PDEA.

“Pwerteng guola nako ana, Mam oi. Naghilak gani akong mga bata. Sakit sa akong side gipakaulawan ko og maayo, ulaw kaayo ang akong pamilya,” pahayag ni Cabaron dihang nahinabi sa Superbalita Cebu kagahapon, kinsa niingon nga sukad sa iyang pagka bata, wa siya makakita sa itsura sa shabu.

Gusto siya nga moadto sa PDEA ug Criminal Investigation and Detection Group (CIDG) aron paglimpyo sa iyang ngan ug pagpakisayod kon kinsa ang nagpaapil sa iyang pangan.

Si Cabaron nitug-an nga nahibaw-an niya ang pagkalakip sa iyang pangan human manawag si Ronda Mayor Mariano Blanco III ug usa sa iyang mga anak nga naghilak nga nagpahibawo niya.

Siya nibutyag nga gusto sa iyang mga anak nga siya mo-resign sa katungdanan tungod sa ilang kabalaka sa iyang seguridad.

“Nahadlok sila kay ipapatay ta. Aw, sige lang, di man ko

guilty ini unsay mahitabo nako. Wiling ko magpa-interview bisan asa,” dugang sa konsehal.

Siya unang nisud sa pulitika isip kapitan sa Barangay Palanas sukad niadtong 2010 hangtod nahimong presidente sa ABC ug ex-officio sa konseho niadtong 2016.

Sa samang tuig, nidagan siya pagkakonsehal sa lungsod ug nidaug sa iyang unang termino.

“Ako dili ko modayeg sa akong kaugalingon, ang tawo ray akong pahukmon nako kon unsay akong pagkatawo sa Ronda, sa Alcantara, Moalboal kay daghan man kog kaila,” dugang ni Cabaron.

Samtang si Bas gawasnon na, apan nag-atubang gihapon og mga kaso may kalambigitan sa ilegal nga paghupot og armas ug granada human nasakmitan sa mga awtoridad gikan sa iyang balay sa Abril sa miaging tuig.

Siya nakapiyansa ug ni-resign gilayon sa pagka-kapitan sa Lagtang, Talisay.

Di na usab siya magpapili pa sa umaabot nga barangay ug Sangguniang Kabataan elections.

DI BASEHANAN

Samtang ang Police Regional Office (PRO) 7 nanalipod sa PDEA sa pagpagawas sa mao nga mga ngalan.

Matod ni Chief Supt. Robert Quenery nga ang maong mga ngalan makadaghan na gihimoan og validation sa intelligence units sa kapulisan ug militar aron masiguro nga tinuod kini.