DUTERTE NIA SA SUGBO KARON

Dunay mahinungdanon nga ipahibawo si Presidente Rodrigo Duterte alang sa mga mamumuo ning kasaulogan sa adlaw sa pamuo diin siya ang mangulo sa kalihokan sa Department of Labor and Employment sa IC3 Convention Center sa dakbayan sa Sugbo karong buntag.

Karong adlawa usab, ihatag sa presidente ang gisaad niini nga P50 milyones alang sa mga benepisyaryo sa Malasakit Center sa Vicente Sotto Memorial Medical Center.

Si Special Assistant to the President Christopher “Bong” Go motunol niini ngadto sa mga opisyal sa Department of Health 7 ug VSMMC karong buntag.

Alas 10 sa buntag, moabot si Duterte sa IC 3 Convention Center diin siya ang moaward sa ceremonial nga yawe sa mananaog sa house and lot sa Pag-ibig Fund, uban ni Labor Secretary Silvestre Bello.

Human niini, i-award sa presidente ang teaching kit ngadto ni Revanee Figues, representante sa 42 ka mga magtutudlo nga kanhi mga overseas Filipino Workers ug nahatagan og mga trabaho sa Department of Education ubos sa “Sa Pinas, Ikaw ang Ma’am/Sir” (SPIMS) OFW Reintegration Convergence Project.

Isunod ang pakigpulong ni Duterte diin matod ni Labor Undersecretary Joel Maglunsod dunay mahinungdanon nga ipahibawo alang sa mga mamumuo.Kuyog sa presidente sila si Executive Secretary Salvador Medialdea, Bello, Trade Secretary Ramon Lopez, Presidential Assistant for the Visayas Michael Lloyd Dino ug uban pa. Moabot sa 17,966 ang bakante nga mga trabaho nga mapilian sa mga aplikante sa mga job fair nga pasiugdahan sa Dole 7 sa IC3 Convention Center ug Negros Oriental Convention Center.