Multicab nabalitok; 8 anyos namatay, 2 angol
Otso anyos nga batang lalake namatay samtang ang iyang inahan ug igsuon nangaangol human ang multicab nga ilang gisakyan natagak sa bung-aw niadtong Dominggo sa alas 3 sa hapon sa Sitio Danao, Brgy. Valencia, dakbayan sa Carcar.
Namatay si Jhon Loyd Himaya, 8, taga Brgy. Bulacao, dakbayan sa Sugbu samtang naangol ang iyang mama nga si Gloria Himaya ,48, ug maguwang nga si Jamayca, 13.
Gitanggong ang driver sa multicab nga si Reliber Allera, 48, minyo, taga Barangay Saragoza, lungsod Aloguinsan. Si PO1 Renante Dayuja, traffic investigator nga nahinabi sa Superbalita Cebu nagkanayon nga ang pamilya Himaya gikan namista sa Sitio Danao 1, Barangay Valencia, Carcar.
Giingong nang-hitch sila sa pagsakay Suzuki multicab (YAT 436) nga gimaniho ug gipanag iya ni Allera.
Si Dayuja niingon nga si Allera taga Brgy. Saragoza, lungsod sa Aloguinsan, namista sa mga paryente niini sa nahisgutang lugar.
Ang pamilya Himaya nanghitch samtang mopauli sa dakbayan sa Sugbu.
Apan sa pag-abot sa subidahon nga bahin sa karsada, napawong ang makina sa multicab hinungdan nga niyatak sa preno si Allera, apan niatras ang sakyanan hinungdan sa pagkatagak sa bung-aw. “Slide na daw kaayo kay
rough road man. Nadailos ang multicab unya ang namatay nalagpot daw. Posible nalatayan pa sa ligid maong namatay,” dugang ni Dayuja.
Ang multicab gikatahong nabalitok, apan sa pag-abot sa mga pulis, gialsa na kini sa mga tawo sa dapit.
Si Dayuja niingon nga wa maangol sila si Allera ug ang asawa niini nga diha sa front
seat samtang ang mga biktima nga naglingkod sa likod nga bukas nangatagak nangalagpot gumikan sa kakalit sa panghitabo.
Gitanggong sa kapulisan si Allera samtang gihikay ang kaso batok kaniya. /