Pulis gibanhigan
Padayon ang gihimong imbestigasyon sa Mambaling police station sa suway nga pagpatay kang PO3 Raymond Zozobrado kanhi sakop sa City Intelligence Branch sa Cebu City Police Office (CCPO).
Si PO3 Zozobrado gikan nag vigil sa haya ni PO2 Kenneth Pogoy sa Barangay Ermita sa syudad sa Sugbo niadtong sabado sa gabii apan pag uli na niya domingo sa kaadlawon kalit lang siya nga gipusil sa riding in tandem sa ubos sa flyover sa barangay Mambaling apan wala hinuon kini maigo.
Matod ni Sr. Insp. Randy Caballes, hepe sa Mambaling police station, nga personal nga angulo ang ilang gisundan nga motibo tungod kay dugay na nga wala mahimong operatiba si PO3 Zozobrado.
"Wala man sad siyay idea kung kinsa ang nag pusil niya sir mao nang hangtod karon wala pa sad tay suspek ani,” matod ni Sr. Insp. Randy Caballes.
Ang hepe sa Police Regional Office (PRO) 7 mimando karon sa CCPO nga palapdan ang himuon nga imbestigasyon human sa lain na usab nga police ang gisuwayan sa pag patay.
Matod ni Chief Supt. Robert Quenery nga usa sa ilang tanawon kung may kalabotan ba sa iyang pagka pulis o duna ba kini naligsan nga mga kriminal nga maoy hinungdan nga angayang palapdan ang himuong imbestigasyon.
Tungod sa maong hitabo diin duha na ka police ang gibanhigan usa niini ang nakalas miawhag si General Quenery sa iyang mga sakop nga dili mokompyansa sa ilang mga lakaw tungod sa pagtuo nga dunay mga dautang elemento nga sila ang gi-target niini.
Niadtong miaging semana gipusil patay si PO2 Pogoy sa riding in tandem human mitambong sa iyang husay sa korte sa kaso sa ilegal nga drugas.