UNIFORM GIPATIK SA LAWAS SA PLAYER
Usa ka Brazilian football superfan ganahan kaayo sa iyang tema diin nidesider siya nga ipatik ang uniporme niini sa tibuok niyang lawas.
Sa taho sa metro.co.uk nagtumbok kang Jose Mauricio dos Anjos migahin og 90 ka oras sa kasakit niadtong milabayng tuig aron lang ang puwa ug itom nga uniporme sa Flamengo gipatik sa iyang lawas.
Human sa 32 ka masakit sesyon, ang porma sa 2015 nga home shirt sa Flamengo nakompleto na.
Ang 33 anyos nga si Dos Anjos nahimong lokal nga inila sa iyang team sa dakbayan sa Rio de Janeiro.
Iyang gihisgutan ang Vice Brazil nga adunay mga tawo nga nangutana kaniya kay nahibung sila nga kanunay kining gasul-ob sa iyang uniprome sa Flamengo.
Giingnan niya ang mantalaan nga ganahan siya magpapatik aron pasidunggan iyang team ug niadtong nag-edad siyag 18 ang ilang mascot iyang gipapatik sa iyang braso.
Kay buot man siyang dakuon kini, si Dos Anjos gikutlo nga mibayad og £16 aron mapatik ang sama usa senina nga anaa sa iyang lawas.
Nagtigom siyang kwarta ug gibaligya ang iyang motorsiklo aron magasto sa pagpatik ug dihang gisugdan na kini ang mipatik kaniya nitangyag nga librehon nalang siya.
Dihang nahuman ang pagpa- tik sa atubangan bahin sa iyang lawas gisunod ang iyang likod nga adunay numero 10 nga maoy numero sa sakit nga si Zico.
Matod niya nga wa siya magmahay sa iyang gibuhat kay iyaha nagkita man usab sila ni Zico niadtong Disyembre sa milabayng tuig.
Natandog siya nga nipirma sa iyang panit si Zico unya ang iyang pirma gipapatik niya.
Midugang siya nga ang ubang mga player sa Flamengo nga iyang pagpapatik gihulagway nila nga “cool”.
Ang amahan sa tulo ka mga anak niakseptar sa patik ug nipadayag nga dugangan pa niya kini alang sa iyang team.
Hinuon, iyang sul-uban sa tinud-an niyang uniporme sa Flamengo samtang naghuwat pa siya kon pwede naba ang preskong patik mabuwad sa adlaw. /