WA MAGDAHOM
Human naminyo si Eurresse Talisic-Misola, wa na siya magdahum nga makasalmot pa og beauty pageant.
Ang lumad sa Brgy. Tuburan Sur, dakbayan sa Danao niangkon nga siya mismo wa makatuo nga bisan sa iyang pagka-inahan sa 2 anyos nga anak-babaye, nga aduna pa siyay ikabuga sa international pageant scene.
“Wala na oy. Mama na baya ko. The sense nga when we think about the pageants diri sa Cebu,
taas og standards: gwapa then taas og height dapat. Nitry ra gyud ko for the luck, at
least man lang nakahibaw ko nga naay pageant nga ingon ana, nindot kaayo. Bisaya nga ni-represent sa country nga wa man lang ka naka-apil og
national pageant then nakauli pa gyud ka og crown,” ni Eurresse,24, sa dihang nahinabi sa Superbalita Cebu.
Siya maoy labing unang Pinay ug Sugbuanon nga nilangkat sa korona isip Mrs. Asia Pacific All Nation 2018.
Gawas sa korona, nakuha sab ni Eurresse ang Best National Costume sa iyang Sinulog-inspired costume ug Most Encouraging Woman of the Year nga mga minor awards.
Gipildi niya ang kapin sa 20 ka mga kandidata sa 13 ka mga nasud nga nisalmot sa maong indigay sa kaanyag, diin nahitabo ang coronation night sa Phoenix Forest City Garden Hotel sa Johor Bahru, Malaysia niadtong Marso 25.
Adbokasiya
Gawas sa maayong pagkatubag ni Eurresse ang question-and-answer portion sa pageant night, nidaug siya nunot sab sa iyang gipangduso nga mga adbokasiya sa maong international pageant.
Duha ka mga plataporma ang gipresentar niini sa mga judges nga mao ang pagbatok sa kagutom sa kabataan ug paghatag og mga panginahanglan sa mga senior citizens ilabi na niadtong anaa sa home for the aged sa ilang dakbayan. “Kaning fighting child hunger, ginabuhat na ni siya namo sa akong batch pag-high school. Every summer and every December, magkapundok mi sa akoang batch, mag-
contribute mi og budget, bisan pila ra gud, used clothes, amo ipanghatag sa mga bata especially ngadto sa mga mountain barangays sa Danao,” sumala pa ni Eurresse.
Dugang niya nga gisugdan sab niya ang feeding program ug gift giving sa mga senior citizen sa home for the aged sa iyang dakbayan sa dihang nagsugod siya ug tudlo sa Cebu Technological University sa Danao niadtong 2014.
Matod ni Eurresse nga personal nga salapi niya, sa iyang mga high-school batchmates ug mga tinun-an niadto ang ilang gigamit alang sa maong mga programa.
Gani bisan human na ang pageant, si Eurresse uban iyang mga higala nihimo og feeding program ug gift giving sa mga bata sa Borbon.
Mahiligon og pageant
Sukad sa pagtungtong niini og high school, wa ug tuo na ang gi-apilan nga mga pageants ni Eurresse gikan sa nagkadaiyang barangay, school-based ug inter-school competitions.
Mas nidaghan pa iyang mga naapilan sa dihang nitungtong na kini sa kolehiyo ug mikuha sa kursong Tourism Management sa Cebu Normal University.
Human nigradwar niadtong 2014, iyang nahimamat ang iyang bana nga dakong nisuporta kaniya.
“Support ra man gyud siya (bana) as long as naa lay mabinlan sa bata. Or it’s either molakaw ko, magdaladala gyud ko aning akong anak, bisan magklase ko sa akong masteral sa una, mag shoot ko, ako siyang (bata) dalhon, kutob sa makaya,’ ni Eurresse kinsa usa ka hands-on nga inahan.
Gawas sa iyang pagka-full time nga inahan ug asawa, kasamtangang nagtudlo si Eurresse sa Cebu Northeastern Colleges- Danao. Gipadayon sab niya iyang
doctoral degree sa kursong business administration.
Pahimangno ni Eurresse sa mga inahan susama niya nga “Put family first in everything you do.”
Sumala niya nga importante gyud ang maayong komunikasyon di lang sa imong bana apan lakip na ang mga anak ug miyembro sa pamilya kon adunay kay gustong pagabuhaton sama sa iyang pagsalmot sa maong pageant. “Pageant is about teaching women to be responsible and empowered women. Versatile ka dapat in all challenges thrown at you,” ni Eurresse ning mantalaan. /