Relasyon sa Kuwait
Taliwala niining nagkainit nga relasyon tali sa Pilipinas ug sa Kuwait, si Presidente Rodrigo Duterte subling nanawagan ngadto sa mga Overseas Filipino Workers (OFW) sa Kuwait nga manguli na alang sa ilang seguridad. Ang pagpadayag sa Presidente nagagumikan sa pipila ka mga domestic helpers nga gipang-abusohan sa mga residente didto sa maong nasod.
Usa sa nakapa-intriga og maayo niini mao kadtong pagdiskobre niadtong Enero sa patay nga lawas sa usa ka maid nga si Joanne Demafelis nga gibutang sa freezer.
Pero human masikop ang mga suspetsado hinayhinay nga gihimo ang panagsabot-sabot nga ilibkas na ni Presidente Duterte ang pagban sa mga Filipino workers sa Kuwait.
Pero ning bag-ohay lang, daw sa niaslom og balik ang relasyon sa duha ka nasod sa dihang ang ambassador sa Pilipinas nga si Renato Villa gi-expel ug gipapauli sa Kuwaiti government human makita sa video ang iyang nga mitabang sa pagpaikyas sa duha ka mga maid nga Pinoy gikan sa ilang amo.
Nasuko ang Kuwaiti government niini tungod kay kining gihimo sa embassy paglapas kini sa sovereignty sa ilang nasod.
So, isip resbak sa gihimo sa Kuwait, mihulga na usab og balik sa Duterte nga i-pull out ang tanan nang mga OFWs sa Kuwait.
Pero unsa kaandam ang Pilipinas kon manguli gyud kining 260,000 ka mga OFWs sa Kuwait?
Di nato ikalimod nga hangtod karon ubos sa pamunoan ni Duterte wa pa masulbad ang unemployment rate sa nasod?
Ang pagpakigsabotsabot og balik sa Pilipinas ngadto sa Kuwait ubos sa diplomasiya nga pamaagi maoy labing maayong solusyon aron mahapsay ang relasyon sa duha ka nasod.
Dili makatabang ang pagpabawos kay sa pagkatinuod lang makapaapiki kini sa atong mga kaigsuonan nga atoa sa Kuwait ug makaapektar kini sa atong ekonomiya.