Narco-list angay ibutyag

Sa akong pagsuwat ning maong lindog, wala pa gibutyag sa Philippine Drug Enforcement Agency (PDEA) ang listahan sa mga barangay of icials nga naghilambigit sa kalihukan sa illegal nga drugas. Karon man unta kadto ipublikar. Apan nakabasa pod ko og news item kagahapon sa Philippine Star nga nagkanayon;

‘Not yet time to release barangay narco-list’.

Buot ipasabot nga dili pa ang tukmang panahon nga ibulgar ang maong opisyal. Mismo si Presidente Duterte ang nagbutyag niini niadtong Domingo didto aa Davao City human siya mibalik gikan sa pagtambong sa Asean summit didto sa Singapore. Iya kunong hatagan og panahon ang gustong mobalik.

Una niini, mismo ang Presidente ang mimando sa PDEA nga ibisto ang mga barangay of icials nga nahilambigit sa drugas nunot niining nagsingabot na ang barangay elections. Apan mi-alma ang Commission on Human Rights (CHR) kay makadaot kini sa dungog sa usa ka tawo ug kalapasan sa tawhanong katungod sa usa ka opisyal nga hinganlan. Matod pa usab sa Comelec nga kon hinganlan ang maong mga opisyal mamahimong mahulog kini sa partisan politics kay negative campaigning man kini.

Morag dili man siguro negative campaigning kay wala man sila gikampaniya nga dili pabutohan. Igo ra man gibutyag sa PDEA nga nahilambigit sila sa illegal nga drugas. Bahala na ang katawhan mopili nila. Aw, hinoon, sakyan gyud kini sa mga kontra ug gamiton panahon sa kampaniya. Ang tumong niini mao man lang ang pagpahibalo sa publiko nga kining maong mga barangay of icials nahilambigit sa illegal nga drugas.

Para nako mas maayong ibutyag ning maong mga pangalan. Apan dili lang kutob diha kon dili ikiha usab. Pero ang naka-porke wala man goy ebidensiya gawas kon madakpan sila sa akto o ma-buy bust. Naa bitaw kanhi mayor Mike Rama nga gihinglan nga drug protector wala man ikiha. Basin sa dili pa ang eleksiyon, ibutyag na gyud kini.