Naapektohan sa piliay?
Labor. Karon ang una nga adlaw sa Mayo ning Tuig 2018 ug adlaw usab karon sa mga mamumuo kon Labor Day. Sa ato pa, pista opisyal karon ug way trabaho sa tanan trabahoan gawas sa medya.
Manghinaut ta nga ning Labor Day way dautan nga mahitabo labina kay ang nagkalainlain nga pundok sa labor magpahigayon og protesta batok sa administrasyon ni Presidente Duterte tungod kay wa pa maimplementar ang iyang gisaad nga “endo” kon pag-undang sa kontraktwalisasyon.
Bisan pa sa pasalig sa kapulisan ang hataas nga pasensya kon “maximum tolerance” sa mga magprotesta apan di kalikayan nga dunay mahitabo nga kasamok unya sama sa nangagi nga protesta kay sa bahin sa mga magprotesta duna man gyuy usa o duha nga gara-garaon.
Si Presidente Duterte mopagawas na unta og executive order nga undangon na ang “endo” apan nausab ang iyang desisyon ug iya na lang gihatag ang katungod sa kongreso sa pagpasar og balaod nga maundang ang “endo”.
Angayan unta nga sabton sa mga lider sa mamumuo nga alang sa ilang kaayohan ang desisyon ni Presidente Duterte nga usa ka balaod ang magpaundang sa pamaagi sa mga employer nga kutob ra sa lima ka buwan ang mga trabahador.
Alang kanako husto ang desisyon ni Presidente Duterte nga dili usa ka executive order ang magpaundang sa “endo” apan usa ka balaod nga ipasar sa kongreso. Tungod kay ang executive order mamahimo nga usbon sa mosunod nga presidente apan ang balaod dili sayon nga amendahon kay magkinahanglan og mayoriya nga boto sa Kamara Baha unya kinahanglan nga maaprobahan pa sa Senado.
Ang nakaapan aning kadaghanan sa mga organisasyon sa mamumuo kay lahi man gud ang ilang idolohiya. Kadaghanan nila didto mohabig sa prinsipyo sa kumonismo. Ang ilang man gud nga katuyoan nga usbon ang atong panggamhanan nga usa ka kumonismo kay ilang kontra ang kapitalismo.
Kining mga lider ug kadagkoan sa mga leftist nga organisasyon nagpakabuta ug bungol sa mga kalamboan karon. Ang Russia ug China nga mga dagko nga nasud ug kumonista ang panggamhanan apan ila na nga giablihan ang ganghaan sa kapitalismo. Wa pa mo ka S?
ELEKSYON. Piliay na gyud sa Barangay ug Sanggnian Kabataan (SK) kay ang modagan nagsugod na og suroy-suroy sa mga sitio. Akong nasugatan kagahapon sa buntag ang akong amigo nga si Artem Tudud kuyog ang iyang anak ug si kanhi LTO Dir. Alex Lesyon diri sa among dapit nga nakighinabi sa mga residente.
Tungod ning umaabot nga eleksyon sa barangay ug SK dunay mga importante nga proyekto sa dakbayan sa Sugbo nga naapektohan tungod kay gibabagan sa oposisyon sa konseho sa pagduda nga usa ni ka pamaagi sa pangampanya ni Mayor Tomas Osmeña.