Bea Alonzo excited na sa iyang “Kasal”
Excited si Bea Alonzo dili sa kasal nilang Gerald Anderson kay layo pa kuno na, kundi sa bag-o niyang pelikula kauban silang Paulo Avelino ug Derek Ramsay.
Gihulagway ni Direk Ruel S. Bayani nga daring ang upcoming
movie nilang “Kasal” nga naghubit sa tulo ka binuhat nga dunay kumplikadong kinabuhi.
Ang usa kuno gusto undangon ang kasal, ang usa gusto ipadayon ang kasal, apan si Bea naglibog kinsay iyang pakaslan.
Love triangle ang peg. Showing na ang “Kasal” sa Star Cinema karong Mayo 16.
Matod ni Ms. Josie S. Pereyra sa JSP Ads and Promo nga basin dunay presscon si Bea Alonzo sa Sugbo karong Mayo 10.
Kon excited ang fans, mas excited kuno si Bea kay lahi ni sa mga nangagi niyang pelikula. Kon madayon si Bea sa Cebu, basabasa lang mo sa atong Laysho kay kamoy una nakong pahibaw-on.
A QUIET PLACE
Ah, wa diay trabaho ron kay adlaw sa mga mamumuo (Labor Day). Nindot itan-aw ron og sine.
Kakita na ko sa horror film nga “A Quiet Place” nga sigengsigengon ka sa kahadlok.
Ang cast dinhi usa ka magtiayon nga dunay tulo ka mga anak nga nagpuyo sa kakahoyan, diin ang mga molupyo gipamatay sa mga alien.
Ang mga alien dili kakita apan sensitibo kaayo ang pandungog. Mao nga kon mag-estorya ang maong pamilya, hinagawhaw lang ug sign language aron dili sila madunggan. Pero dunay subtitles.
Matod pa sa line ad sa maong pelikula: “If they hear you, they hunt you.” Bitin ang ending kay duna pa diay part 2.
PGT 6
As expected, ang spiral pole dancer ug single mama nga si Kristel ang gideklarar nga grand champion sa Pilipinas Got Talent grand finals niadtong Dominggo. Kahinumdom ko pag-audition pa lang ni Kristel, niingon dayon si Vice Ganda nga duna na tay winner nga maoy iyang gihatagan sa Golden Buzzer.
Ang “Power Duo” nga nikampyon sad sa last season nga PGT giingnan sad to ni Vice nga silay modaug. Nagpaila lang unsa ka influential ni Vice Ganda.
Mas maayo tingali sa sunod wa na siyay labanan aron dili sad unfair sa uban.
Sa unang 4 ka season, puros singer ang nidaug. Karon na sad sa season 5 ug 6, puros dancer. Maayo kaha? /