Magselos sa amo

Dear Noy Kulas,

Maayong adlaw kanimo. Tawga lang ko og Jenjen, 36 years old, minyo, secretary sa usa ka company.

Sa akong travaho, Noy, di malikayan nga makakuyog sa akong amo kay apil na sa akong official function. Mao ni ang nakaproblema nako karon. Ang akong bana magsige og selos sa akong amo tungod lagi ini.

Di pa mi uyab naa na ko ani nga company. Dihang nagkaila ug nagkauyab mi, nakahibawo na siya nga ang akong amo maayo og tinagdan nako, maora ko og sakop sa iyang pamilya. Buotan kaayo ning akong amo. Pero ang akong bana, dihang nagkaminyo mi, nikalit lang og selos bisan nakahibawo na siya sa batasan sa akong boss.

Nagdugay ko sa company di lang tungod sa maayong suweldo, kon di tungod sa maayong dinad an sa akong boss ug sa iyang pamilya. Karon, unsa may akong buhaton? Pirme na lang mi magaway sa akong bana tungod ani. Please tambagi ko.

JENJEN

Jen,

Mas maayo tingali nga ipaila-ila usab nimo ang imong bana sa imong boss. Kon dunay event nga paapilon ang pamilya, dad-a usab ang imong bana aron magkaila sila sa imong amo. Posibleng usa ni sa hinungdan kon nganong nagselos na siya karon kay stranger pa niya ni.

Di usab ka makabasol sa imong bana tungod kay bisan dinhi sa akong column, duna nay pipila nga sama nimo, nalambigit sa ilang amo. Kana man gud tungod sa mga events karon diin grabe ang relasyon nga di unta angay mahitabo. Di malikayan ma-influence ang huna-huna sa imong bana ug ni bisan kinsa nga sama sa imong bana, naa nianang inyong sitwasyon karon.

Ayaw lang sakyi kaayo kon unsa man ang naa sa huna-huna sa imong bana. Naa may uban, tinud-on na lang tungod sa ilang kasuko sa partner mao nga misamot ang sitwasyon. Busa, ayaw pagbuhat og mga lakang nga makapasamot sa sitwasyon. Instead, buhat og mga lakang aron mas close pa mo sa imong bana. Unya, ubani ni og pag-ampo kay mao ni ang labing lig-ong armas batok sa mga hulga sa pamilya.

NOY KULAS