Beautiful liar
Nagdali kong misulod sa gate sa university nga akong gitunghaan. Dugay kong nakamata rong bunataga kay nag-asikaso ko sa akong school assignment kagabii. Dugay kong nakatulog. Hapit na ang oras sa akong klase. Nag-summer class ko ron. Laay man sa balay kon mag-urong lang. “Good morning, beautiful liar!” Nakalingi ko. Sus, ang karaho, dako kaayog tingsi. Nagsunod diay nako si Noel. “Tse!” Gisulingahan ko si Noel. Gipakusgan ko pa ang akong paglakaw. Naglagot gyud ko aning Noel. Mabugal-bugalon kaayo nako. Guwapo ug macho ra ba unta apan way maayong kinaiya. Gipusdak ko ang akong sampot sa lingkoranan pagsulod ko na sa klasrom sa una kong subject karong buntaga.
“Haaayyy! Buntag pa gani gibuwisit ka na, no, ni Noel?”
Nagpanglingo si Cassey nga naglingkod sa akong tapad. Kami gyud ang magtapad paglingkod sa mga subject nga nagkaklasmet mi.
“Nakatag-an ka. Gibuwisit gyud ko sa karaho. Ngano ba sab, uy, nga tawgon man ko niyag beautiful liar?”
Wa gyud koy maayong buot. Puwerte nakong kusmora.
“Da, pasagdi na siya, uy, Ivon. Close friend man gud sila si Rodel. Aw, sa’a man sab nimo. Gipalaum-laom nimo si Rodel sa wala.”
“Sabot man to namo ni Rodel, Cass. Sugton ko siya pero sa kondisyon nga kon di gyud ko makat-on sa pagmahal niya, makigbuwag ko niya. Mamugos man gyud siya nga sugton nako.”
Nakapanglingu-lingo ko. Nagbasol na nuon ko nga gisugot ko si Rodel, unya after one month, gibuwagan ko siya.
“Wa tingali makadawat si Noel kay tan-awa, miundang og eskuwela si Rodel, wa tiwasa ang semester nga hapit na man unta mahuman ug closing na.”
Niadtong buwan sa Pebrero ko gisugot si Rodel, unya sa buwan sa Marso nakigbuwag ko niya. Unsaon, wa man gyud koy pagmahal niya.
“Sa’a man sab ni Rodel, Cass, kay iya man kong gipugos sa pagpasugot niya. Igo man lang kong nagtuman sa among sabot. Igo man lang kong nagsunod sa pinitik sa akong kasingkasing.”
Nahunong ang among pag-estorya ni Cassey dihang misulod na sa klasrom ang among propesora nga nagkusmod lang. Puwerteng estriktaha ani, uy.
Anang pagka hapon, pagkahuman sa akong last subject, nagdali kong mipaingon sa gate. Nakit-an ko si Noel sa main lobby. Misurok ang akong dugo sa kalagot. (SUMPAYAN)