Kahiusahan
Maoy naabtan ni Edsel ang iyang Lolo Temyong sa nataran sa balay niini. Malipayon kining naglingkod sa lingkuranang tuwang-tuwang nga ginama sa uway. Sa atubangan diha ang gamay nga talad ug may tasa nga nag-aso-aso pa sa init nga kape nga may pares nga pandesal. Nasiklapan ni Edsel ang gulang niyang iyaan nga nag-amuma sa iyang Lolo didto sa kusina nagluto. Sa kilid sa gamayng talad may duha ka lingkuranan nga nag-atbang.
“Lolo Temyong, maayong buntag!” ni Edsel nga miamen dayon sa iyang apuhan nga 80 anyos na, apan abtik ug tuyhad pa kaayo kon molakaw. Retirado nga maestro sa elementaryang publiko ang Lolo ni Edsel nga magdawatan og binulang pensiyon gikan sa GSIS. Dugay na nga nabiyudo ang iyang apuhan, nga bisan unsao og hangyo sa iyang (Edsel) Papa ug Mama nga adto na mopuyo sa ilang balay sa kinapusoran sa siyudad, nagpabilin nga mi-estar sa karaang balay dinhi sa bukirang barangay sa siyudad.
“Uy, maayo kay midalikyat og duaw ang ulitawo kong apo nga nangambisyong mag-abogado!” ni Lolo Temyong nga mitarong paglingkod sa lingkuranang tuwang-tuwang nga nagkupot gihapon sa hulad sa SUPER B.
Mipahiyom si Edsel. Nahibawo ang iyang Lolo nga moradwar na siya kursong AB-Political Science nga maoy iyang preparasyon aron mopadayon sa kursong LLB kun Bachelor of Laws.
“Mingawon ko nimo, Lolo Tem! Ganahan kong makig-tsika nimo karon sa dagway sa pamulitika sa atong nasod, ilabi na dinhi sa atong siyudad,” ni Edsel nga milingkod sa lingkuranan diha sa natad nga nag-atubang sa iyang apuhang lalake.
“Nagpadayon hangtod karon ang maot ug laksot nga dagway sa pulitika sa atong nasod, Ed. Ug mao usab ang dagan sa pulitika dinhi sa atong siyudad. Basta way kahiusahan ang mga pulitiko, sa modaog ug mapilde, sa matag eleksiyon, hinay ug magkamang gyud ang gidamgong kalambuan sa matag proyekto sa usa ka siyudad.”
“Bitaw, Lo, no! Kanus-a pa kaha magkahiusa ang mga pulitiko nga dili na magpatas-anay og garbo, dili na mobabag sa mga maayong proyekto sa midaog nga pulitiko ug dili ipahunong ang maayong proyekto nga nasugdan sa kanhi pilderong pulitiko. Unta ang nakadaog nga mga pulitiko nga nakalingkod na sa ilang puwesto, dili gayud magdumot sa pilderong pulitiko ug sa mga dumadapig niini!”
“Kahiusahan ang gikinahanglan, Ed, sa mga pulitiko sa nagkalainlaing partido. Dili kay mag-iyahay lag kinihaay sa korte ang midaog ug pilderong mga pulitiko, uban sa ilang mga sakop sa nagkaatbang nga mga partido, nga maoy nakapasamot sa kalangay sa gidamgong kalambuan sa siyudad. Unta, modawat dayon og kapildihan ang matag pulitiko nga way dumtanay ug mag-uliay dayon sa maayong kabubut-on ang nagkontrang mga pulitiko inig kahuman sa eleksiyon!” Nakapanakla si Lolo Temyong.
“Husto ka, Lolo!” Nakapanglingo si Edsel. Husto gyud ang panahom ug pag-analisar sa iyang Lolo Temyong. Kahiusahan sa mga pulitiko sa matag nagkontrang partido. Ug kooperasyon sa matag usa ang gikinahanglan aron paspas ang dagan sa kalambuan sa usa ka siyudad. (KATAPUSAN)