GINS PILDI SA ROS; ACES DAOG
Cone wala magpa-interview
Nangayo og pasaylo si coach Tim Cone sa mga sumosunod sa Brgy. Ginebra Gin Kings human nasubhan og dakong kapildihan ang crowd-favorite batok sa Rain or Shine Elasto Painters, 89-108, niadtong Dominggo sa Philippine Basketball Association (PBA) Commissioner’s Cup sa Araneta Coliseum.
Sa iyang kapungot, si Cone wala nagpa-interbyu sa reporters human sa duwa hinuon, nag-post ang multi-titled coach sa iyang Twitter account aron ipadayag ang iyang gibati.
“Terrible, terrible, terrible. I’m sorry you had to watch that. No excuses,” tweet ni Cone.
Ang import sa Gin Kings nga si Charles Garcia tatawng nabag-uhan sa init nga panahon sa Pilipinas apan nakamaneho lang gihapon kini pag-amot og 19 puntos alang sa Gin Kings.
Ang Gin Kings gipangulohan ni Japeth Aguilar pinaagi sa iyang 28 puntos ug 12 rebounds, nidugang og 13 puntos si LA Tenorio samtang niamot og 11 puntos si Joe Devance.
Gipasalig ni Cone nga ma- kabawi ra ang Gin Kings sa umaabot nga mga adlaw.
Ang Elasto Painters gipangulohan ni Raymond Almazan pinaagi sa iyang 20 puntos, nidugang og 17 puntos si Ed Daquiaog samtang nihatag og 16 puntos si import Reggie Johnson.
Sa laing duwa, ningbangon gikan sa pagkapandol ang Alaska Aces ug ilang gipahimungtan ang Blackwater Elite, 93-74.
Ang Aces, nga nasubhan og 103-109 nga kapildihan batok sa Rain or Shine, gipangulohan ni Vic Manuel nga may 27 puntos sa 18 ka mga minutos nga pagduwa.