Sultan walay pressure: Villamor
Anaa pa man tuod si ALA fighter Jonas Sultan nga nagbabag sa agianan ni International Boxing Federation (IBF) super flyweight king Jerwin Ancajas apan ang kampo ni Ancajas naghisgot na og lain nga away.
Masabot nga sobra ka dako ang pagsalig sa kampo ni Ancajas nga madepensaan sa ilang batos ang korona niini batok kang Sultan, kinsa maoy mandatory contender.
Ang makasaysayong panagharong nila ni Ancajas (29-1-1, 20KOs) ug Sultan (14-3, 9KOs) gikatakda karong Mayo 26 sa Fresno, California.
Mao kini ang labing unang higayon sulod sa kapin sa siyam ka mga dekada nga duha ka Pinoyng mga boksidor ang magparang alang sa usa ka world title bout.
Si Top Rank boss Bob Arum, kinsa maoy promoter ni Ancajas, nagplano nang iparang si Ancajas batok kang World Boxing Association (WBA) super flyweight champion Khalid Yafai, kinsa moaway sa undercard sa Ancajas-Sultan bout batok kang David Carmona.
Kon parehong modaog sila si Ancajas ug Yafai sa Fresno promotion, gibutyag nang daan ni Arum nga iparang niya ang duha ka mga boksidor sa umaabot sa usa ka unification bout basi sa taho sa www.ringTV.com.
Imbes nga mahagit, ang kampo ni Sultan mihangop niini nga usa ka maanindot nga musika alang sa ilang pangdungog.
“Mao na’y ganahan ni Jonas, kanang underdog siya. Pareha sab atong iyang away ni Casimero, kadaghanan nag-ingon nga wala siya’y dag-anan atong awaya pero nidaog siya,’ matod ni Edito Villamor, head trainer sa ALA stable.
Si Sultan mirehistro og impresibong unanimous decision nga kadaugan batok sa kanhi world champion nga si Johnriel Casimero niadtong Septiyembre 16 sa miaging sa Waterfront Hotel sa Lahug, Cebu City.
“Wala gyu’y pressure si Jonas aning awaya. Wala siya nagpaapekto sa bisan unsa pa’y sulti sa uban. Ang pressure naa karon ni Jerwin kay bisan dili siya ang nagsulti, pero naa na ma’y nagplano sa next fight niya,” dugang ni Villamor.
Gipasabot ni Villamor nga nagtutok lang si Sultan sa iyang training.
“In high spirit man si Jonas. Ready gyud siya aning awaya ug nag-focus lang gyud siya sa among game plan.” asoy ni Villamor.