UK-OK MIPUYO SA DUNGGAN, BUHI
Kon may nakit-an kang mananap diha sa pagkaon o kaha may kaka nga anaa sa ilawom sa imong katre maulpot na kita sa kakulba.
Apan lahi, ang kasinatian ni Katie Holley dihang may uk-ok nga mipuyo sa iyang dunggan.
Si Holley nasayod nga ang uk-ok mokamang ug mosud sa dunggan unya mahimong mopuyo kini.
Niadtong milabayng buwan, nakamata siya sa tungang gabii tungod sa lahi niyang pamati sa iyang walang bangag sa dunggan diin daw sa may nibutang niini og ice.
Dihang gibitad niya ang cotton swab, may nikuyog niini nga duha ka dark brown unya daut nga butang diha sa tumoy, saysay niya sa Self Magazine nga gikutlo sa mirror.co.uk.
Pipila ka gutlo ang milabay, iyang nabantayan nga mga tiil man kini sa uk-ok.
Iyang gitumbok nga nakuyawan na siya ug ang bana ni Holley mikuyog kaniya aron sutaon ang unsay nasud sa iyang dunggan.
Gitan-aw sa bana iyang dunggan ug nakompirmar niini nga adunay uk-ok nga diha sa sud ug nga padung na kini sa iyang utok.
Apan, di sila mahimo nga maoy mokuha sa tibuok ukok nga diha sa iyang dunggan busa si Holley nga taga Florida gidala sa hospital.
Giatiman siya sa mga doktor ug gipainom og tambal apan wa mamatay ang mananap.
Nitataw siya nga di siya makasabot sa iyang gibati samtang anaa pa sa iyang dunggan ang uk-ok.
Tulo ka parte sa lawas sa mananap ang nakuha diin gituohan sa mga doktor nga ang kinatibuk-an na kini nga ukok ang nakuha ug gihatagan si Holley og antibiotics.
Apan, milabay ang siyam ka adlaw ang iyang gibati mibalik lang gihapon.
Padayon ang pagsakit sa iyang dunggan busa nakigkita na usab siya og doktor, kinsa mikuha na usab kini og laing unom pa ka mga uk-ok.
Si Holley gipaadto og ENT specialist nga doktor aron maseguro nga wa nay mananap nga makuha pa sa iyang dunggan.
Iyang gihulagway nga ang doktor migamit og daw sa dako kaayo nga gunting diin nakuha nini ang tibuok ulo, taas nga bahin sa dughan, ug daghang tiil.
Giingnan si Holley sa ENT specialist nga magkuha siyag mga mananap nga anaa sa dunggan sa mga tawo anaa usa sa matag buwan ug siya ang ikaduhang tawo nga gikuhaan niya niini niadtong adlawa. /