■NASUNOGAN:

Ingon sa nagsinardinas ang mga lumolupyo sa Sityo Kawit, Barangay Ermita, dakbayan sa Sugbo, nga namuyo sa barangay gym. Kagahapon, nakadawat sila og laing hinabang.

Nakadawat og P3.47 milyones nga balor sa relief goods ang mga pamilya nga nasunogan sa Brgy. Ermita, siyudad sa Sugbo niadtong Lunes gikan sa Department of Social Welfare and Development (DSWD) 7 kagahapon.

Ang Philippine Charity Sweepstakes Office (PCSO) nisaad nga mohatag og P1 milyon nga financial assistance alang sa apektadong 600 ka mga pamilya sa sunog niadtong Lunes.

Si Ermita Barangay Kapitan Mark Rizaldy Miral niingon nga idugang niya ang P1 milyon sa ilang P400,000 nga calamity fund aron maayudahan ang mga pamilya kon unsa pay panginahanglan labi na sa pagpatukod og panimay.

Samtang, si Special Assistant to the President (SAP) Christopher Lawrence “Bong” Go, nirepresentar ni Presidente Rodrigo Duterte, maoy nitunol sa mga hinabang ngadto sa mga pamilya uban sa tag P2,000 nga tabang pinansiyal.

“Mao nang naa mi diri para makiramay, careful lang ta sa sunod, mga safety measures, mga saksakan, mga gasul, ingat lang ta gamay. Trabaho nako ni motuyok mopaabot dili naman gud tanang lugar matuyokan sa atoang presidente,” pahayag ni Go dihang nahinabi sa mga tigbalita kagahapon.

Atol sa distribution, iyang gibaylo ang iyang gisul-ob nga sapatos sa tsinelas nga gisul-ob ni Albert Manubag, 30, kinsa wa magdahom nga siya ang mapilian sa kalihim.