32 KA MGA KAPITAN GIKIHA NI OSMEÑA
WA KUNO MAKALIKIDAR SA FINANCIAL ASSISTANCE
Tungod sa giingong kapakyas sa pag-liquidate sa cash
assistance gikan sa Cebu City Government sa nanglabay nga katuigan, si Mayor Tomas Osmeña nikiha sa laing batch sa mga barangay kapitan ngadto sa Office of the Ombudsman.
Kagahapon, 32 ka mga kapitan ang iyang gipasakaan og kaso, apan sa pagsuwat ning taho, 22 pa ang dunay mga ngan.
Sa iyang news conference kagahapon, si Osmeña nipahimangno nga mga 50 ka barangay kapitan, apil na si kanhi Tinago barangay captain ug karon City Councilor Joel Garganera nga mabilanggo sila tungod sa kapakyas sa pag-liquidate sa financial assistance. “Mr. Garganera, you’re going to jail and so will other 50 other barangay captains because no matter what happens in this election, I’m still the mayor and I’m just doing my job so don’t say it’s none of my business,” sulti
niya ngadto sa mga reporter.
Niadtong miaging Biyernes, si Osmeña nipasaka og mga kasong administratiba ug kriminal batok kanila ni Barangay Captain Ramil Ayuman sa Apas, Alexander Ibarita sa Bonbon, Nerisa Antolihao sa Budlaan, Anne Alcover sa Agsungot, Wilson Bacor sa Binaliw, Nieves Narra sa Adlaon ug Dante Tabucal sa Sudlon I.
Ang mga barangay dunay unliquidated financial assistance nga nagkantidad og P11.3 million sa Apas, P8.2 million sa Bonbon, P15.8 million sa Budlaan, P14.6 million sa Agsungot, P11.2 million sa Binaliw, P12.4 million sa Adlaon ug P9.5 million sa Sudlon I. Nipasaka si Osmeña og administrative complaint nga grave misconduct, conduct prejudicial to the best interest of the service and conduct unbecoming of a public official ug criminal complaints sa paglapas sa pipila ka mga probisyon sa Revised Penal Code batok sa pito ka mga barangay
captain niadtong Biyernes. Sayo pa, si Osmeña nipasaka og samang mga kaso niadtong Miyerkules batok kanila ni Barangay Captains Phillip Zafra sa Tisa, Maria Yvonne Feliciano sa Calamba, Yolandito Cagang sa Basak-Pardo, Norman Navarro sa Basak San Nicolas, Trifonio Lequigan Jr. sa Kamputhaw, Julius Guioguio sa Pasil, Lemar Alcover sa Sambag 1, ug Rafael Briones sa Tinago.
Si City Attorney Joseph Bernaldez niingon nga ang mga barangay kapitan gihangyo na nga mo-liquidate bisan wa pa mo-disallow ang Commission on Audit (COA) sa P800 million nga sa mga barangay nga giapod-apod sa miaging administrasyon niadtong 2015.
“It’s very reasonable for them to ask us to give more time to liquidate because the financial assistance was released in 2015 yet,” nagkanayon si Bernaldez. Nipakita usab si Osmeña sa records gikan sa City Accountant nga nagpakita nga ang Barangay Tinago dunay P14 million nga unliquidated financial assistance sukad niadtong 2015. Kini bisan sa pagpasabot
ni Garganera, kinsa mao ang kanhi barangay kapitan sa Tinago, nga siya naka-liquidate sa P8 million gikan sa kinatibuk-ang kantidad.
“There is nothing new aning atong mayor. Mao pa gani paglingkod niya, gikiha na ko og carnapping bisan giuli na
ang sakyanan,” matod ni Garganera sa Superbalita Cebu.
Siya niingon nga ang gibuhat sa mayor mao ang pagpanimawos kanila, labina kaniya nga maoy nipasaka sa Writ of Kalikasan nga gipaboran sa Korte Suprema bag-ohay lang.
Subli niyang giingon nga na-settle na ang tanan nga iyang nagasto atol sa iyang administrasyon.
Si Feliciano,sa iyang bahin, niingon nga nakapadala na siya og suwat ngadto sa Accounting Office sayo ning tuiga kalabot sa liquidation.
Siya nagtuo nga ang kaso batok kanila ingon man ang nagung-ung nga pagpakatap unya sa flyers batok kanila kabahin sa progpagan sa eleksyon. “Well, karong panahona election time man, di lang ta magpadala kon unsay mga
black propaganda nga ipahid nato ba kay kuan man gud kaayo mura bag kana bitawng pamolitika ra kaayo. So, kita na lay magpasabot sa mga tawo nga di lang ta magpadala. Total ang eleksyon usa ka adlaw ra man, ig human wala rana oy,” sulti ni Feliciano sa Superbalita Cebu. / RVC, dugang taho nila ni REV, Treshea Mae Phrea Y. De Pio – STC Intern