Dili apektado ang MCWD sa stoppage order sa Dole

Dili apektado ang supply sa tubig sa Metropolitan Cebu Water District (MCWD) sa work stoppage (WSO) order nga giluwatan sa Department of Labor and Employment batok sa private supplier niini nga Cebu-Manila Water Development.

Si Charmaine Rodriguez-Kara, tigpamaba sa MCWD, namahayag nga base sa gipahibawo sa CMWD, ang gipahunong og trabaho sa Dole 7 ang pagpaandar sa sludge pond.

“Kani man gung sludge, usa ni siya ka by product sa common sa pag-filter sa tubig gikan sa atoang mga tinubdan. Ang atoang main concern is kining operations nila nga moapektar sa atoang supply sa tubig. Klaro na siya nga wala gyuy epekto,” sumala ni Kara.

Si Engr. Ruby Mercado, operations head sa CMWD, nitataw nga ang ubang parte sa ilang kompaniya kay padayon ang pag-operate gawas lang sa lagoon nga maoy nahagbongan ni Renato Peroso.

Matod niya, nga mogawas na sa tambalanan si Peroso sud sa duha ka adlaw.

Si Dole 7 regional Director Atty. Alvin Villamor niingon ang pag-isyu sa WSO nagagumikan human sa aksidente sa usa sa mga trahante sa CMWD niadtong Abril 30, 2018 dihang nahagbong kini sa lagoon sa treatment plan nga giingong dunay submersible water pump nga nagdagan ilawom sa tubig.

Siya niingon si Peroso kuyog sa laing duha ka mga kauban maoy nagbantay sa pag-drain sa waste sa lagoon sa treatment plant.

Base sa mga resulta sa Occupational Safety and Heath Investigation (OSHI), nagpakita nga ang tuo nga tiil ni Peroso kay nahabilin sud sa pump dihang naluwas kini sa iyang mga kauban gikan sa lagoon.

Apan daling giklaro ang nahagbongan ni Peroso kay dili ibomba padung sa linya sa tubig alang sa mga konsumedor sa MCWD.

Siya nipasabot ang sludge nga pacilidad kay susama sa ilang pacilidad sa Buhisan ug Jaclupan, Talisay, nga dunay pond nga adto dakpon ang tubig diin dunay lapok nga bahin.

“This is a very unfortunate event. Obviously, there were no guard rails installed on all sides of the lagoon. That facility could have been prevented Peroso from falling,” dugang ni Villamor.