Mga kandidato sa Mandaue mipirmag peace covenant

Malampuson ang gihimong peace covenant signing tali sa mga kandidato sa barangay ug Sanguniang Kabataan (SK) sa dakbayan sa Mandaue nga gipanguluhan sa Mandaue City Police Office (MCPO) sa City Cultural and Sports Complex kagahapon sa buntag.

Apan sa 720 ka mga kandidato sa barangay ug SK Elections, 680 lang niini ang inisyal nga nanambong.

Matod ni PCInsp. Mercy Villaro sa MCPO sa dihang nahinabi sa mga tigbalita, sagad sa mga kandidato nga wa nitambong adunay naka-schedule nang daan nga pagpangampanya.

Dugang niya nga ubay-ubay sa mga kandidato ang na-late o naabot na nga human na ang sermonyas samtang adunay ga nituyo og adto sa MCPO headquartes aron mangayo og dispensa sa wa pagtambong.

Gitataw ni Villaro nga gituyo nila og pasiugda ang kalihukan aron makuha ang pasalig gikan sa mga kandidato nga mokoordinar ug motabang alang sa limpyo ug malinawong piniliay.

Sa programa, nipadayag sa ilang Unity Pledge of Commitment ang mga kandidato ug human niini nag-symbolic signing sila sa tarpaulin isip timaan sa pagsunod sa hangyo sa otoridad gawas sa pagtuman sa balaod nga nalatid sa election code.

Nitambong sa kalihukan mao si Mandaue election supervisor Atty. Edwin Cadungog, PSSupt. Angelito Dumangeng kinsa nirepresenta sa hepe sa MCPO nga si PSSUpt. Roberto Alanas ug Jhoaden Lucero, pangulo sa DILG- Mandaue.