NAGPAHIPI NGA PARAISO CAVE

Gawas sa nindot ug puti nga bas nga mga beach resort, gipasigarbo usab sa lungsod sa San Francisco, isla sa Camotes, amihanang Sugbo, ang mga langub nga dunay tubig sa sud diin mahimo mangaligo ug magpabugnaw ang mga turista.

Usa na niini ang Paraiso Cave and Restaurant sa Sitio Manka, Barangay Consuelo.

Ang lugar haom ning panahon sa ting-init, diin naglagiting ang kainit sa adlaw ug ang atong lawas nangita og bugnaw nga tubig.

Ang Paraiso Cave and Res- taurant gidumala ni Estelita Barcenas.

Matod niya nga niadtong 2011 nadiskubrihan sa kanhi tag-iya sa luna ang langub nga dunay nagtubod nga tubig sa sud.

Ang lote napalit ni Ma. Ginna Dayuday-Stuhldreher, higala ni Barcenas, nga maoy nipalambo ug nihimo niini ngadto sa dapit suroyanan.

Sa entrance area pa lang sa Paraiso Cave, mosugat na ang nindot nga talan-awon sa garden nga dunay lainlaing mga klase sa buwak, lunhaw nga mga tanom, mga punoan sa lubi ug ubang klase sa kahoy.

Makadani usab ang nindot nga landscape sa garden nga makapagaan sa imong pamati.

Ang presensiya sa mga punoan sa mga kahoy maghatag usab og landong sa lugar ug bugnaw nga hangin.

Inig sud nimo sa cave, mosubay ka sa hagdanan paingon sa ubos nga dunay gunitanan.

Pag-amping lang nga di ka mapakong sa mga bato ug ayaw kompiyansa kay kuyaw kon ikaw ma-slide labi na kon basa ang imong mga tiil.

Sa sud sa langub, di ingana kadako ang hawan ug di maayo kon daghan ang mga turista nga modagsa kay maghuot ug gamay lang ang dapit diin dunay tubig ug mangaligo ang mga tawo.

Ang tubig sa langub kay nagsagol ang parat ug tab-ang ug bugnaw usab.

Dunay bahin sa tubig nga molapas sa tawo ang sukod samtang naay parte nga kutob sa hawak.

Sa kasamtangan, dunay duha ka lawak nga paabangan alang sa mga bisita nga gusto mag-overnight sa dapit.

Ang usa kay tag P1,200 ang bayranan nga haom alang sa duha ka tawo ug dunay aircon,

TV set, electric fan, ug kaugalingon nga pansayan ug shower.

Samtang ang usa kay tag P2,900 nga masigo usab ang duha ka tawo, Aduna kini aircon, TV set, sala, ug kusina. Pulos adunay wifi connection ang duha ka mga lawak.

May bayad nga P50 nga entrance fee ang gusto mosulod sa Paraiso Cave and Restaurant nga mobukas matag adlaw gikan sa alas 7:30 sa buntag hangtod alas 6 sa gabii.

Kon wala ka magdala og pagkaon, ang restaurant kay dunay pambato nga Hayahay burger sa tag P80 matag usa ug mahimo usab ka magpaluto og tinolang manok sa tag P180. /