Ang tumong

Nahibaw-an sa mga sakop sa Team Rama ang planong pagpakatap og mga election flyers nga nagbutang sa giingong unliquidated nga mga financial assistance sa barangay sa mga kapitan sukad niadtong 2013. Gawas niani, duna nay mga kapitan ug kanhi kapitan ang gipangkiha ni Mayor Tomas Osmeña ngadto sa Ombudsman, usa niini si Konsehal Joel Garganera. Apan si Garganera niingon nga dugay na siyang naka-liquidate o nakasumada sa gipangdapatan sa inancial assistance nga moabot og P8 million.

Matod pa ni Garganera, kon duna man untay moreklamo, mao kini ang Commission on Audit (COA), di ang mayor kay di kini niya gimbuhaton.

Sa flyers, naa nakasuwat ang kantidad sa giingong assistance. Matag barangay, lainlain ang figure.

Bisan pag unsaon, maisip kini nga propaganda ni Osmeña batok sa mga kapitan nga di niya kaalyado. Naa ba siyay kaalyado nga unliquidated ang financial assistance hangtod karon?

Giangkon ni Osmeña nga siya ang nagpasiugda niini aron kuno masayod ug magiyahan ang katawhan kinsa ang ilang botaran.

Di kini giya, kon di propaganda kini batok sa mga kapitan nga di niya kaalyado. Iya ning giatol karong eleksyon aron abagan ang iyang mga kandidato sa pagdaug ning eleksyon, sa ingon ilang mailog ang mayoriya sa mga kapitan.

Kon kadaghanan sa iyang mga manok ang modaug, mailog nila ang Association of Barangay Councils (ABC) nga dunay usa ka lingkuranan sa Konseho.

Kon madugangan na og usa ang Bando Osmeña Pundok Kauswagan (BOPK) sa Konseho, sayon na lang nila pagbuak sa numero kon dunay panagtabla sa mga botasyon.

Kini mao ang tinud-anay nga tumong ni Osmeña sa iyang pagpagawas sa flyers, di ang paggiya sa mga botante.