Nisalmot sa traffic summit nanga-late?
Gikataho nga wa dayon makasugod ang traffic summit nga gitakda niadtong Miyerkoles didto sa Kapitolyo nga gitumong sa pagkab-ot sa usa ka hiniusang plano sa trapiko aron masulbad ang nagkagrabe nga suliran sa trapiko sa Metro Cebu.
Gitambongan kini sa gobernador, mga mayor ug mga opisyales sa 13 ka mga lungsod ug mga syudad sa Metro Cebu, mga representante sa nagkalain-laing ahensiya sa gobyerno nasyonal, mga urban development ug traffic experts sa Japan International Cooperation Agency (Jica) ug Ramon Aboitiz Foundation Inc. (Rafi).
Apan unsa man ang hinungdan nganong wa dayon makasugod ang traffic summit? Nanga-late ang mga nisalmot niini kay natanggong sa traffic ug wa dayon makaabot sa Kapitolyo.
Ang Metro Cebu gilangkuban sa mga syudad sa Sugbo, Danao, Lapu-Lapu, Talisay, Mandaue, Naga ug Carcar ug sa mga lungsod sa San Fernando, Liloan, Consolacion, Minglanilla, Compostela ug Cordova.
Ang tanang mga local government units (LGUs) sa Metro Cebu, gawas sa syudad sa Sugbo, nagpadala og mga opisyales o representante sa maong traffic summit nga gipasiugdahan sa Cebu provincial government ug sa Mega Cebu Development Coordinating Board (MCDCB).
Ang syudad sa Sugbo mao ang labing highly-urbanized sa tanang mga syudad sa Metro Cebu ug sentro sa kahuot sa trapiko. Kon di kini mosalmot, mahimo kaha ang usa ka hiniusang plano sa trapiko sa Metro Cebu?
Dunay nag-ingon nga tingalig naigo sa dimalas ang Metro Cebu kay 13 man ka mga LGUs ang naglangkob niini gikan sa Danao paingon sa Carcar. Kadtong nituo nga dimalas ang numero 13 niingon nga maayo tingali nga iapil na lang ang Carmen ug Sibonga aron ma-15 ang Metro Cebu. Basin mawagtang ang dimalas.
Apan ang labing dimalas mao ang hukom ni Cebu City Mayor Tomas Osmeña nga di moapil sa traffic summit kay nag-usik lang kini sa panahon ug di siya magpa-under sa MCDCB. “It’s a waste of time,” matod pa niya.
Wa mabalaka niini si Cebu Gov. Junjun Davide. Matod niya, ang traffic plans nga motumaw atol sa summit mahimong ikonektar sa traffic plans sa Cebu City.
Nangalate ang mga nisalmot niini kay natanggong sa traffic ug wa dayon makaabot sa Kapitolyo.