Segment director sa PGT gibasol
Bisan pa nga kutob ra sa semi-finals ang Dancing Fire Warriors sa Lapulapu City sa bag-o lang nahuman nga Pilipinas Got Talent (PGT), mapasalamaton gihapon ang choreographer nga si Ringo Jay Trinio sa talagsaong kahigayonan.
Nagpasalamat usab siya sa Lapulapu City government sa gihatag niining suporta.
Nasagmuyo lang kuno siya nga sa dayon na nilang pasundayag, tingali mga 30 na lang ka gutlo, kalit gipausab sa segment director ang ilang mga pautot ug gipaatras sila nga duol na kaayo sa LED wall hinungdan nga naglisod na hinuon og lihok ang mga nagdala sa mga nagdilaab nga props.
Nakapangutana ko kon di ba kaha to gituyo aron mominus ang impact sa ilang performance. Nangambot si Jay. Tsk-tsk-tsk!
Sa ikatulong higayon, mobisita ang relic ni Sta. Teresita sa St. Therese Archdiocesan Shrine sa Brgy. Obispo, Calubian, Leyte karong Mayo 18. Kadaghan na ko nakabisita sa shrine pero wa pa ko katayming nga naa ang relic.
Nanghinaut ko nga makasaksi ko ning mahinungdanong hitabo. Matud pa ni higalang Rey Martinez nga matawag nga ‘founder’ sa shrine, ‘Mobalik na usab si Sta. Teresita sa iyang pinuy-anan.
Gibati kog dakong garbo nga napiling usa sa mga hurado sa gipahigayon nga Ambassador & Ambassadress of Talamban niadtong Mayo 5 didto sa Talamban gym. Onse ka maanyag ug laing onse ka ambongang mga batan-on sa Talamban ang nagtigi alang sa maong mga titulo.
Sa katapusan, nahukman si Joshua Enrique isip Ambassador ug si Alexandra Kaye Chua isip Ambassadress. Si Bryan Nabua ug Merhydel Ang ang 1st runners-up samtang si Joshua Chan ug Lynn Cuambot ang 2nd runners-up. Ikatulo na ka tuig nga gipasiugdahan ni Christine Claire ‘Ching’ Bontuyan ang kalihukan nga gidugok ug gikahimut-an sa mga taga Talamban ug ubang dapit.
Si Ching, Borgie Cabigas ug Papa Dom ang mga tigpaila.
○ ○ ○ Nadayon ra gyud ang taudtaud nang giplano nga pagbisita sa E-Group sa inanayng nabantog nga Cebu Safari Adventure Park sa Toril, Brgy Corte, Carmen sa amihanang Cebu.
Gi-organisar kini sa promo diva nga si Josie Pereyra ug gisuportahan sa mga tag-iya mismo sa park nga sila si Senyorito Michel ug Senyorita Amparito Lhuillier ug sa tagdumala nga si Jojo Loop.
Sulod sa pila ka oras nalibot namo ang pila ka bahin sa 323 ka ektarya nga gihimong pinuy-anan sa 111 ka klase sa mga hayop ug di maihap nga klase sa mga tanom.
Di lisod ang pagbalhinbalhin gikan sa usa ka dapit ngadto sa sunod kay naay mga tram nga kasakyan. May mga dapit sa park nga padayong giandam alang sa dugang pang mga hayop.
Duna say gipangpanday pa diin adto ang mga makapakitbi-sa-atay nga mga sakyanan. Tungod niini, naghinamhinam pa gihapon kong mobalik sa park sa madugay o sa madali.