Ang anak ni Clark

Duha na ka tuig nga kasal sila si Clark ug si Katryn, apan wa pa momabdos si Katryn. Mikonsulta si Clark kang Dr. Mike Obando bahin sa iyang ‘pagkalalaki.’

“Suma sa lab test nga akong gihimo, weak imong mga sperm. Dali ra silang mangamatay, maong di sila ka-fertilize sa egg sa babaye,” tug-an ni Dr. Mike.

“Unsay gipasabot ana, Dok?” ni Clark nga nagkisdom ang nawong,

“Kuli nga makaanak ka. In common parlance, sterile ka,” ni Dr. Mike. “Pero resitaan tikag mga bitamin. Basin makatabang kini nimo.”

Paglabay sa usa ka tuig wa gihapon momabdos si Katryn.

Usa ka sayong buntag nahigmata si Clark sa paggakos ni Katryn kaniya ug mihalok sa iyang ngabil. “Happy birthday, darling!”

“Salamat, darling! 27 na diay ko karon!” ni Clark nga mibawos paggakos kang Katryn.

Didto sa iyang opisina sa kompaniya nga iyang gialagaran isip internal auditor nakigkita si Clark kang Darwin, ang general accountant, nga iyang suod nga higala. Ulitawo pa kini.

“BD nako ron, Parts. Adto ta manihapon sa balay. Ikaw ray akong giimbitar,” ni Clark.

“Okey. One-on-one diay ta unya!” ni Darwin. “Makahurot kaha tag usa ka case beer?”

“Di man ni pinugsanay atoa. Kon igo na, di undang!” ni Clark nga mingisi.

Nianang pagka alas singko sa hapon nagdungan og gawas sa ilang opisina si Clark ug si Darwin. Sakay sa serbis nga awto ni Clark may gihangyo si Clark kang Darwin nga usa ka butang nga nakapahibulong sa naulahi.

“Tinuod ka, parts? Wa ka magtiaw?” nahimalingka si Darwin.

“Wa ko magtiaw, parts! Ayaw ko pakyasa!” ni Clark nga milingi kang Darwin.

“Okey. Alang kanimo, buhaton ko kana!” ni Darwin.

Taudtaod nahiabot sila si Clark ug Darwin sa bunggalo nga balay ni Clark.

“Andama na ang komedor, darling, aron manihapon na ta,” ni Clark kang Katryn. “Meantime, dad-i mig beer diri sa sala. Motan-aw mi sa duwa sa NBA.”

“Sure, darling,” ni Katryn nga mitan-aw kang Darwin nga nagpahiyom kaniya.

Dihang nakap-os na sila sa ilang panihapon, miapil si Katryn pagtan-aw sa duwa sa NBA. Dihang nagduka na siya nananghid si Katryn nga mouna’g katulog.

Nagpadayon sa ilang inom si Clark ug si Darwin samtang nagtan-aw sa TV. Paglabay sa daghang mga gutlo kay daghan na’g nainom si Clark mihamlay kini sa sopa. Mitindog si Darwin ug nagkinto nga mipaingon sa kuwarto nilang Clark ug Katryn. Nagkang-a ang pultahan. Pawong ang suga. Gihinay pagtulod ni Darwin ang sera sa pultahan ug misulod nga maampingon. “Clark?” hagawhaw ni Katryn. “Si Darwin ko, Kat. Hubog na si Clark.” Wa makatingog si Katryn kay nakalitan. Apan kalit usab nga may talagsaong pagbati nga misaog sa iyang galamhan nga wa pa niya sukad mabati uban sa lalake nga dili niya bana. Gigakos siya ni Darwin kansang mga ngabil dali rang nakatultol sa iyang mga ngabil..

Paglabay sa siyam ka bulan nanganak si Katryn. Usa ka himsog nga batang lalake ang nahimugso. Malipayon kaayo si Clark nga nagkugos sa puya. Didto sa hunahuna ni Katryn mihukom siya nga dili niya itug-an sa iyang bana ang tinuod nga amahan sa bata.

USA ka hapon gikan sa ilang opisina, nag-inom si Clark ug Darwin sa usa ka beer house.

“Salamat kaayo, parts, ha, sa imong panabang,” ni Clark human niya’g tungab sa botelya sa beer. “May anak na gyud ko!”

“Ay, don’t mention it, parts. It was done alang sa imong kalipay,” ni Darwin nga mipikpik sa abaga ni Clark. “Tinuod nga nahubog gyud ka adtong gabhiona, parts?”

Miyango si Clark. “Hinaot, di ni mahibaw-an ni Katryn, parts!”

“Magpabilin kining sekreto nato, parts, until death!” pasalig ni Darwin.

(KATAPUSAN)