Vision of love
Mitarong kog lingkod. Morag wa man gud ko mahimutang. Nia si Nikko ron sa akong atubangan, klaro nga gusto siyang makigbalik nako.
“Ngano man diay, Nikko, unsa may imong gibati ron nako?”
Gusto kong mahibaw-an dayon kon unsa gyuy tuyo ni Nikko aning iyang pagpamisita ron nako.
“Kuan, Lyza, na-feel nako nga love na gyud tika.”
Nakapanghupaw ko. Wa gyud ko masayop sa akong pagtuo.
“Pero nakahibawo ka na, Nikko, sa rason kon nganong nagbuwag ta? Ibutang nato nga nagtug-an ka sa tinuod nga love na ko nimo. Pero sa akong bahin wa ko mobati ana nimo.”
Giprangkahan ko si Nikko. Di ko gusto nga magtuo siya nga duna siyay paglaom sa iyang pagpangulitawo og balik nako ron.
“I know. Di man ingon ana kadali nga mahitabo nga magkauli ta. I understand the situation. Wa sab ko magdali, Lyza.”
Nahunahuna nako nga tinud-anay gyud ang tinguha ni Nikko nga magkabalik mi. Apan sa akong bahin, nagtuo ko nga imposible ang gustong mahitabo ni Nikko.
“Mas maayo tingali nga mohunong ka na anang imong tuyo nako, Nikko. Sa atong
pagbuwag, wa man ko sakiti bisag gamay. Wa ko mangandoy nga makita tika. Wa ko mobatig kamingaw nimo. Usa ra ang buot ipasabot ani, wa gyud koy love nimo, Nikko.”
Sakit ang akong pagprangka. Apan gituyo ko kini aron di na mopadayon sa pagpangulitawog usab ni Nikko nako. Di ko gusto nga masamok ang akong hunahuna. Nagkonsentret na ko sa akong pag-eskuwela. Gusto gyud kong makahuman sa Civil Engineering. Mao kini ang kurso nga akong gikuha ug third year na ko ron. Kanunay man gani kong nag-summer class aron makahuman dayon ko sa college.
Naghilom si Nikko. Nagblush ang iyang nawong. Gisakitan ug nauwaw gyud tingali siya sa akong pagprangka niya.
“Bitaw, Nikko, mas makaayo nimo nga mentras sayo pa, makahibawo ka na nga wa koy pagmahal nimo.”
“Di man ana kadali kalimtan ang gibat ko ron nimo, Lyza. Uwahi man tingali nga mibati na kog true love nimo kay nagkabuwag na man ta, pero pasagdi lang ko nga magpadayon sa pagpamisita nimo.”
Nangawot ko sa akong ulo. Nasuta ko nga di ko mapugos si Nikko sa pagpahunong sa iyang pagpangulitawo ron nakog usab.
(SUMPAYAN)