‘Ambush me’ ni Loot?
Daghang kilay ang miisa ug mihimo og konklusiyon nga usa ka stage managed o “ambush me” ang nahitabong pagpamanhig kang Daanbantayan Mayor Vicente Loot Jr., ug sa iyang pamilya niadtong Domingo sa buntag didto sa bag-ong pantalan sa Barangay Maya. Gikan ang pamilyang Loot sa Malapascua island, sakop sa Daanbantayan, kay mitambong og pista sa dihang gipa-arakan sila sa mga armadong tawo sa ilang pagdunggo.
Upat ka mga tawo ang nasamdan sa pagpangrakrak. Duha ka drivers, usa ka yaya ug napagan ang usa ka porter. Walay tatsa sila si retired PNP General Loot, iyang asawa nga si Malou, Provincial Board member Sun Simura ug mga apo ni Loot. Misibat dayon ang mga namusil sakay sa get away motorcycles.
Gumikan kay wala man maunsa si Loot nga posibling maoy real target, moingon dayon ang publiko nga “ambush me.” Kana bang “scripted” o dramadrama lang. Unfair o dili man usab maki-angayon kanang maong pamasangil. Judgmental ra kaayo kita. Kanus-a pa man diay mo motuo? Kanang patay na gyud?
Kon “stage managed,” nganong himuon man usab kana ni Loot? Unsa may iyang makuha? Publisidad? Kon nagdrama-drama ang mayor dili usab siguro niya ibutang sa peligro ang iyang mga apo nga walay labot sa bisan unsa mang kontrobersiya nga iyang gikalamhigitan. Maayo unta og siya rang usa kay magduda ta. Unya duna pa goy nasamdan. Mitumaw lang kining maong pagduda gumikan lagi kay wala man masamdi si Loot. Kay gusto gyud siyang kuha-on, nganong dili gud makuha.
Wala siyay mga bodyguards niadtong tungura. Ug ambot nakadala ba siya og armas. Kon nakasukol siya, aw, daghan ang maangin. Hulga ra siguro kadto. Now, unsa may motibo ug nagpaluyo kaha niadto. Pulitika? Aw, kon pulitika walay laing kapasanginlan kon dili ang iyang mga kontra. O sa iyang pagka-drug protector? Usa si Loot sa mga pulitiko nga gihinganlan ni President Duterte nga narco-politician. Kon kana ang anggulo, gobiyerno nay iyang kontra.