Online love scam
Matod pa ni Konsehal Julie Flores sa lungsod sa Barili, sa iyang mensahe sa selebrasyon sa kaminyuon nila ni Joseph Kong ug ni Primrose Pacenio didto sa syudad sa Carcar, dunay mga tawo nga nipili nga maminyo, dunay nipili nga magpabilin ulitawo ug dagang guwang.
Dunay mga tawo nga wa pa gyud makahibalag sa ilang hinigugma nga ilang ikauban sa tibuok nilang kinabuhi. Tingali gitagana silag sa usag-usa apan wa lang gyud sila magkita. Apan matod pas taga Cabadiangan, mag-abot man gani ang isda ug ang luwag, sila pa kaha?
Ang uban namasin pinaagi sa Internet. Daghan kanila nahimong biktima sa gitawag nga “love scam,” sumala pa sa Philippine National Police Anti-Cybercrime Group (PNP-ACG).
○ ○ ○
Daghan nang mga scam nga atong nahibaw-an. Dunay pyramiding scam, fake gold bars scam ug uban pa. Ang labing dako mao kadtong kang Janet Lim-Napoles, ang P10 bilyunes nga pork barrel scam sa mga magbabalaod.
Sa online love scam, ang lalake ug babaye magkahinigugmaay kuno pinaagi sa Internet, sa mga online dating sites. Apan di lang diha kutob, hukhokan ug panguwartahan ang nabiktima. Dali ra man kaayong ipadala ang kuwarta sa mga remittance centers.
Si Senior Insp. Artemio Cinco Jr., tigpamaba sa ACG, ang ahensiya nga gitahasan sa pagpatuman sa mga balaod batok sa mga cybercrimes, niingon nga lisod gukdon ang mga online love scammers.
Gibana-bana nga moabot sa 67 milyunes ka mga Pilipino ang migamit sa Internet. Busa posible nga sila mga biktima o kaha mga suspetsado sa online love scam.
Ang mga biktima, matod pa ni Cinco, gitawag nga mga “willing victims.”
Kadtong nakuhaan og kuwarta niadtong nagpakaaron-ingnon nga ilang hinigugma sa Internet, sama da sa mga biktima sa krimen nga estafa ug nanginahanglan og usa ka private complainant una pa ikapasaka ang kaso.
Pero tinuod ba silang nahigugma. Kadaghanan diay nabiktima kay ang nangilad kanila nagpakaaron-ingnonn nga mga langyaw, kay namasin nga makadto sa gawas sa nasod, pahatagon og kuwarta kay dunay package nga moabot gikan sa maong langyaw.
Gibana-bana nga moabot sa 67 milyunes ka mga Pilipino ang migamit sa Internet. Busa posible nga sila mga biktima o kaha mga suspetsado sa online love scam.