Agresibo si Davide
Di madugay ang Cebu Capitol modughit na sa panganod. Mahitabo ni tungod sa 20 ka andana nga edipisyo nga tukuron sa probinsiya sa Sugbo.
Nanganawkanaw ang tinguha sa gobernador sa pagtukod niining high-rise building nga nagtug-an sa iyang kaagresibo isip lider sa Sugbo.
Matukod ni diha sa nahimutangan sa karaang BAEX bldg. nga gibiyaan kay natandog ang kalig-on niini niadtong kusog nga linog nga niuyog sa Sugbo sa Oct. 15, 2013.
Humana ang iyang pakigsabot sa Development Bank of the Philippines (DBP) sa loan nga P1.5 billion alang niini, ang pagtangdo na lang sa Provincial Board ang kuwang.
Naglumba ang banking sector
sa pagpahuwam sa probinsiya tungod kay hamugaway kini sa assets nga P32.42 billion tala sa 2016 nga may balayranan nga P2.19 billion. Adunay income ning tuiga nga P965.42 million.
Ang lider nga naglantaw og kaayuhan manisikaysikay ug morisgo sama sa gihimo ni Davide. Apan ning bahina maka-income ang kapitolyo kay paabangan man ang ubang mga andana.
Ingon ani unta ang tumong sa kagamhanan. Build and
earn, di kay build and build but always losing. Hats off ko kang Davide niining iyang gihimo.
Ginaingon nga ang tawo sa iyang paglakaw adunay mga tunob nga molakra sa yuta. Kini ang tunob sa legasiya nga ibilin sa gobernador sa iya unyang pagbiya sa katungdanan.
Ang mga Sugbuanon nga motan-aw ug mohangad sa bilding di kapugong mohandom ug mohangad sa gobernador sa ingon di siya makalimtan inigtaob ug hunas sa panahon.
Nahibawo ko nga ang mga kritiko dayog ingon pangandam ni niya sa umaabot nga eleksiyon sa 2019 o bisan unsa na lay gihunahunaan nga hugawng pangagpas.
Apan ako seguro nga ang edipisyo motindog ni nga ligong kaabin niya kon magpapili siya pag-usab sa umaabot nga local eleksiyon sa 2019.
Hats off ko kang Davide niining iyang gihimo.