SEX TOY NASAKMIT SA JAIL GREYHOUND
GITUOHANG GIPULIHAN-PULIHAN OG GAMIT SA MGA PINIRISO
Usa ka silicon nga sex toy maoy usa sa mga nakuha sa mga otoridad atol sa greyhound operation sa mga taga- Bureau of Jail Management and Penology (BJMP) 7 ug kapulisan sa dakbayan sa Mandaue didto sa City Jail kagahapon sa buntag.
Ang maong sex toy susama og hulma sa pridadong bahin sa usa ka babaye.
Kini nakuha sa selda sa gidudahang drug lord nga si Steve Go.
Nagtuo ang mga otoridad nga ang maong duwaan gipulipulihan na og gamit sa mga piniriso sanglit aduna na man kini mga ginagmay nga tatsa.
Matod ni jail Warden Supt. Jessie Calumpang nga gawas sa maong sex toy, nakakuha sab ang BJMP 7 og kapulisan og lima ka cellphone, mga charger niini, lighters, gunting ug mga mahait nga butang gawas sa drug paraphernalia.
Way drugas nga nakuha ang mga otoridad atol sa operasyon nga nahitabo mga alas 5 sa buntag kagahapon.
Nasuta ning mantalaan nga kini na ang ikaduhang greyhound operation sa maong pasilidad sud ning buwana.
Nagsige og himo og greyhound operation ang BJMP ug kapulisan sa Mandaue City Jail sa mga nilabayng buwan.
Sagad makuha sa mga operasyon, mga kontrabando ug drug paraphernalia inubanan sa mga mahait nga hinagiban.
Ang way kahubasanan sa makuhang kontrabando sud sa mga selda sa piniriso sa city jail maoy usa sa mga nakitang problema sa otoridad.
Sayo ning buwana, si Calumpang nagkanayon nga aduna silay gidudahan nga mga jail officer nga possibleng kakonsabo sa mga piniriso sa pagpalusod og mga kontrabando.
Kini maoy hinungdan nga pito ka mga kawani sa city jail ang girelibohan sa ilang pwesto samtang gipaubos una og imbestigasyon kon tinuod ang mga pasangil.
Sa dihang nahinabi sa mga tigbalita kagahapon, si Calumpang niingon nga possibleng nakasud sab ang mga kontrabando tungod kay ipaagi kini sa koral sa maong pasilidad.
Gituohan nga kini ilabay o ipaagi og higot ang pagpasud niini nga di mabantayan ilabi na kon gabie tungod kay di man makita sa gwardiya ug di sab makita sa closed-circuit television (CCTV). /