Bata giabandonar, giluwas
Hilak nga sama sa nangita og inahan ang minglanog sa pedia ward sa Talisay District Hospital gikan sa kapin usa ka tuig nga batang lalake.
Makita sa panagway sa bata nga si Baby Miguel (di tinuod nga pangan) ang makaluluoy nga kahimtang niini nga sapot lang pang-ibabaw ang gisul-ob ug nag-diaper.
May upat ka samad nga inagian sa paso sa sigarilyo ang nawong niini ug dayag usab nga kuwang kini sa pag-atiman sa mga ginikanan gumikan sa tumang kadaut o kuwang sa timbang ug maglisod og barog o lingkod.
Kon dunay mga hamtong nga moduol niini, daw sa magpakiluoy ang mga mata niini nga kugoson ug mogunit sa kamot.
Ang mga tagtungod sa mga pasyente sa pedia ward ang magpulipuli og bantay ug pakaon ni Baby Miguel nga mag 2 anyos karong Hunyo 27.
Sigon sa mga silingan sa bata nga giingong tiggamitan og gidili nga drugas ang inahan niini nga si Minda (di tinuod pangan) nga nilayas sa ilang gipuy-an ug nikuyog sa laing lalake.
Samtang ang amahan niini nga si Mark, nag-sideline isip construction worker, giingong tigsuyop usab, dugang asoy sa ilang mga silingan.
Si Baby Miguel nalandig sa ospital niadtong Lunes human naluwas sa mga sakop sa Department of Social Welfare and Services sa kagamhanan sa siyudad sa Talisay kuyog sa iyang upat ka mga maguwang gikan sa ilang gipuy-an Barangay Linao.
Ang iyang mga maguwang, 6, 5, ug 3 anyos anaa sa kustodiya sa Talisay City Women and Children Development Center sa Barangay Maghaway, samtang ang 2 anyos naa sa ilang amahan. May duha pa sila ka magsuon, 12 anyos nga lalake nga naninda og buko pie ug usa ka dispatser samtang ang 10 anyos nga babaye kay tua sa Mindanao.