Kapin sa 70 ka establisemento minglapas
Kapin sa 70 ka mga establisemento sa dakbayan sa Lapu-Lapu nga gituohang milapas sa 3-meter easement gikan sa baybayon base sa inisyal nga listahan sa Department of Environment and Natural Resources (DENR) 7.
Ang Lapu-Lapu City government nipasiugda og Shoreline Summit sa miaging adlaw aron nga katutokan ug masulbad ang suliran sa nagkadaiyang mga estruktura nga nilapas na sa kadagatagan.
Nasuta sa inspection sa DENR nga sagad sa mga estruktura nga milapas 3-meter easement mao ang mga gitukod nga seawalls, dikes, kural, edipisyo, restaurants, swimming pools, causeway, ripraps, cottages, viewing deck, guard outpost, man-made islets, pantalan, kabalayan (informal settlers ug sa usa ka subdivision).
“Kinahanglan nga magsinukdanay ta ani to check kon milapas,” matod ni Atty. Ethelbert Ouano, city legal office.
Matod pa ni Ouano nga cooperative ang mga establishment owner nga motuman sa lagda o paghimo og koreksiyon sa ilang nahimong kalapasan.
Wa una mohatag og mga ngalan ang Siyudad niadtong mga establisemento nga gikatahong nakalapas sa Water Code samtang wa pay pakisusi nga gihimo ang kagamhanan.
Si Mayor Paz Radaza, sa iyang bahin, nipasabot nga di niya buot nga mahisama ang Lapu-Lapu sa isla sa Boracay nga gipasira sud sa unom ka buwan alang sa rehabilitasyon.
“Let it be our initiative to self-rehabilitate, to protect our investment and the entire industry,” matod sa mayor atol sa summit nga gipahigayon sa Waterfront Mactan Hotel & Casino.
Gipahinumduman sa opisyal ang stakeholders nga mogamit sa ilang water treatment facilities gikihanglan nga limpyo nga tubig ang ipagawas sa dagat.
Human sa tigom na-uyonan nga mohulma og Task Force nga langkuban sa Lapu-Lapu City Government ug DENR nga maoy tahasan sa pagbantay niadtong mga establishments o structures nga naabot na sa dagat ang pagtukod.
Kini ang modeterminar niadtong struktura nga angayang gub-on gumikan sa nahimong kalapasan.
Ang Shoreline Summit gitambungan sa Tourism regional director – Shalimar Hofer Tamano, Dept. of Health director – Jaime Bernadas, Environment Management Bureau head – William Cuñado, DILG hear – Rene Burdeos, DENR director – Gilbert Gonzales ingon man ang tourism sectors ug ubang opisyal sa city hall. /