Walay molabaw sa balaod: CCTO

Gipadayag sa Cebu City Transportation Office (CCTO) nga igo ra silang naghimo sa ilang trabaho ug wa nila gi-target ang ambulansiya sa pribadong tambalanan ug sa Emergency Rescue Unit Foundation (Eruf) kinsa nakalapas sa lagda sa trapiko.

Si Francisco Ouano, operations head sa CCTO, nibutyag nga kanunay nga mag-parkingan ang mga ambulansiya sa Cebu Doctor’s Hospital sa maong karsada ug naatlan nga diha usab ang ambulansiya sa Eruf nga naghatod og pasyente dihang nag-roving ang ilang patrol vehicle.

“Wa gyud tay exempted kay di lang ni siya kausa, kaduha kon di pipila na ni kahigayon nga gi-claman nato not only ambulance but some fire truck, garbage truck and government plates kay ang ato gyud no one is above the law,” saysay ni Ouano.

Matod ni Ouano nga naka-clamp sila og ambulance niadto nga gipanag-iya sa Barangay Inayawan, Pardo ug Tisa lakip na ang mga garbage truck nga iya sa Barangay Sambag-I, Tinago ug uban pang barangay.

Si Ouano niingon nga aduna siyay text nga nadawat nga ang parking area alang sa ambulansiya sa Cebu Doctors gigamit kining parkingan sa service vehicle sa tag-iya.

Sa Facebook post ni Mayor Tomas Osmeña nakita didto nga may Aston Martin (sports car) ug Range Rover (SUV) nga nakaparada diin nakabutang sa ibabaw nga “no picture taking.”

Gitug-an ni Ouano nga niabot na og kapin o kuwang P35 milyones ang nakolekta sa siyudad gumikan sa mga traffic violation apil na ang clamping gikan niadtong Enero hangtod karon.

PARKING SA CEBU DOC

Gipadayag sa management sa tambalanan nga nasulbad na ang problema (clamping) ug ilang gipahibawo nga naningkamot ang ilang tambalanan nga makahatag silag igong parking area alang sa ilang mga kliyente.

“We have already provided parking spaces for our ambulances, company vehicles and employee services behind Osmeña blvd, Gov. M. Roa street. We have also acquired a new property across our south entrance which we will convert to additional parking space,” tipik sa ilang press release human sa hitabo.

KOLEKTAHAN OG BUHIS

Gipahibawo ni Osmeña nga nalakip sa iyang kamanduan ang pagpaningil og buhis sa Cebu Doctors University Hospital kinsa niingon nga ang ilang matang sa operasyon non-profit.

Matod sa mayor nga gi-deny sa korte ang injunction nga ilang gisang-at batok sa Cebu City Government sanglit una kini niyang gipaninglan dihang wa pa nipuli sa katungdanan si kanhi Mayor Michael Rama niadtong tuig 2010.

“I have bigger tax evaders to fight at the moment, but rest assured CDU is in my order of priority. In 2010 alone they already owed Cebu City 160M. For the subsequent years they owe far more than that,” matod ni Osmeña sa iyang Facebook page.