Daghang mipiit ni Duterte
Kalit kadtong kadaugan ni Pres. Rodrigo Duterte sa dihang 16M ka mga Pilipino ang nakadayeg sa iyang kawsa batok drugas, kurapsyon ug kriminalidad. Wala mabantayi sa iyang mga kaatbang nga bagang duot sa katawhan maoy mibaswat sa iyang kadaugan.
Daghang mipiit kaniya nga mahigugmaon sa dunot nga sistema sa pagpahimolos alang personal nga interes.
Mipiit ni Duterte ang mga druglords, drug user, drug pusher, drug protector, triad nga maoy tinubdan sa drugas gikan sa laing kanasoran, gambling lords, traditional politicians, oligarchs o adunahan nga tikasan nga milihay sa bulohisan ug rebelde nga nagtinil og itom nga idolohiya.
Druglords sama nila ni Jaguar, Sabalones, Kerwin, Odicta ug uban pa nga tua sa bilanggoan nagsalig sa mga protector. Naa sila sa listahan ni Duterte nga naglakip nila ni Noynoy Aquino, Mar Roxas, Franklin Drilon, Antonio Trillanes, Leila de Lima ug uban pang mga narco-politician, mga heneral ug ubang kadagkoan sa kapolisan, mga huwes ug uban pa sa judiciary.
Kini ang hinungdan nga napakyas si Duterte paghawan sa drugas basi sa iyang gibahad ug gisaad. Maong dili makalaom si Duterte sa maayong padulngan sa iyang administrasyon kay daghan sa palibot ang nagpiit kaniya.
Gituohan nga bugtong makasulbad ang pagdeklarar og revolutionary govt. niining tuiga nga maoy dalan nga ikaduso ang gitinguhang federal system.
Gani ang mga pundok nga mipabor ni Duterte molusad og people’s initiative nga magawhag og revolutionary govt. nga pasiugdahan sa Kilusang Pagbabago, PRRD Movement, MRRD Movement, Ex-military, Ex-police, Ex-navy, Ex-marines, Guardians, Reservists, Reserve Officers for Defense and Intelligence ug daghan pang kahugpongan nga pro-Duterte.
Giitsapwera sa grupo si PAV Michael Dino kay nanguha og taga LP nga manumpa sa PDP-Laban. Sa revolutionary govt. papahawaon ang mga piniling opisyal ug maoy ipuli ang mga itudlo sa presidente. Apan dili magdugay kay ibalik ra sab ang naandang piniliay subay na sa sistemang federalismo nga naggakos gihapon sa katahom sa demokrasya. Apan si Defense Sec. Delfin Lorenzana supak sa revolutionary govt. ingon man si kanhi Pres. Fidel Ramos tungod kay konektado sa US Central Intelligence Agency (CIA). Busa dili angay nga mokompyansa si Duterte nila ni Lorenzana, Ramos ug uban pang nagtakuban.
Bahin sa kurapsyon ug ubang kalapasan walay gilitan si Duterte sa iyang mga tinudlo. Basta dili epektibo sa serbisyo tangtang. Gani nangahanaw sa katungdanan ang 44 ka mga dagkong opisyal gikan ni China Envoy Fidel Ramos hangtod ning ulahi nga si Philhealth Chief Celestina Maria Jude dela Serna.