Angay nga monitoron
Naukay ang publiko sa pagka bisto sa unom ka tinun-an nga nasakpang naghithit og marijuana niadtong Miyerkules sa hapon. Nahitabo ni sa likod sa Cebu City Sports Center sakop sa Barangay Sambag 1.
Bag-ohay pa nga nangabli ang mga publikong tunghaan alang sa tuig tingtungha 20182019. Nitumaw na kining maong problema.
Nagpasabot lang nga kining pagka gumon sa ginadiling drugas sa mga batan-on usa ka seryosong problema nga di angay palabyon. Kung dunay unom nga nasakpan sa Sambag 1 posibli ba sab nga susamang problema ang gisagubang sa ubang barangay diin mga tinunan sab ang mga nalambigit?
Pangutana kini nga angay nga pangitaan og tubag sa atong mga tinugyanan sa balaod. Basin baya sa taas natong paghinanok mamat-an nalang nato ang paglipang sa problema unya lisod na kaayong santaon kay nakagamot.
PAGPAKABANA
Duna nay mga lakang nga gustong pasiugdahan ang kapolisan pagsulbad sa maong problema. Makig-alayon sila sa mga tinugyanan sa eskwelahan. Mao ni dinalian nga lakang nga sagad atong madunggan kong motumaw ang ingon niini nga problema.
Sa akong tan-aw kulang pa ni. Kinahanglan nga ilang iapil ang mga ginikanan. Sa akong pagtoo duna silay ikatampo.
Basin duna silay mga kasayuran nga magamit sa kapolisan alang sa ilang monitoring. Dako ang posibilidad nga ang nga ginikanan nakapaniid og di kasarangan nga panlihoklihok sa ilang mga anak didto sa ilang balay.
Mahimong masumpay-sumpay sa mga polis ang imbestigasyon ug surveilance nga pagahimoon. Kini nga problema di lang polis ang mosulbad. Kinahanglan nga magtinabangay ang polis, ginikanan ug eskwelahan pagpitol ug pagsumpo ning maong bisyo . Mas bentaha kong ang estudyante na gyud ang motahan sa iyang kaugalingon alang sa dinaliang rehabilitasyon.
HUBOG
Ang laing problema nga pangitaan og solusyon mao kining hubog hubog sa ubang tinunan inay klase maoy atubangon. Kamong mga ginikanan ka pila namo nakasakop sa inyong mga anak nga nipauli nga hubog. Bisan gani sa adlaw sa tingklase. Problema sab ni kay napasagdaan naman ang ilang klase.
Ang nakaparat ang uban niining mga imnanan nahimutang pa gyud duol sa mga eskwelahan. Ambot kong nagmonitor niini ang taga city hall. Busa sa PTA meeting pasiugdahan manghinaot ta nga kini mahisgutan. Lakip na ang posibling pagtumaw sa kagubot nga maglambigit og mga frat o gang nga komon kaayo sa atong dapit.
Mga problema kini nga di mada og brigada eskwela. Problema nga nakaapekto og dako sa edukasyon sa atong mga tinun-an. Hugot nga monitoring sa katilungban ang gikinahanglan. Sama sa nagpakabana nga molopyo sa barangay Sambag 1 nga maoy nanawag og polis aron ireport ang hinithitay.