Di kadawat

Dear Noy Kulas,

Just call me Jess, 17 anyos. Ang akong problema bahin sa akong uyab nga nakigbuwag nako. Nagbuwag mi bisan sakit sa among kabubut-on kay gusto siyang mo-focus sa iyang pag-eskwela. Pero di ko makadawat kay wa may igong rason, mabaw kaayo. Bisan ako gusto unta nako pero di nako kaya nga mawala siya. Maglisod ko nga di na mi magkita o makig-communicate.

Nahigugma gihapon ko niya until now. Angay ba nakong paabuton nga mahuman mi sa college bisan dugay pa kaayo o putlon na nako ang akong pagpaabot ug mobalhin ko og lain? Palihug tambagi ko, Noy Kulas.

JESS

Jess,

Maayong adlaw nimo. Daghang salamat sa imong suwat. Managlahi ang tawo. Dunay uban ganahan nga mo-focus lang og usa ka butang. Kana bang baliwala nila ang uban, apan sa kaulahian, ila diay nga gimahal. Uwahi na nila kini nga naamguhan. Dihang wa na ang tawo nga ilang gimahal, diha pa sila nakakita sa kaimportante. Hayan mao ni ang nahitabo nimo.

Pasagdi kon kana ang iyang nakab-ot nga hukom kay alang ra usab kana sa iyang kaayuhan. Maanindot man ang iyang tumong nga mao ang pag-focus sa studies instead nga magkarelasyon mo unya mabahin pa ang iyang huna-huna sa inyong sitwasyon. Nakita tingali niya nga madisturbo ang iyang mga tumong ug buot kab-uton ning panahuna kon magpadayon ang inyong relasyon.

Ako motuo kog destiny. Nagtuo ko nga duna nay gitagana nga tawo o subayon nga dan ang Ginuo alang sa tagsa kanato. Busa, kon duna may tawo nga moabot sa atoang kinabuhi, gitakda na kini. Ang panagtagbo di lang sulagma. Busa, alang nako, kon magkabuwag mo karon, wa ni magpasabot nga di na magkaabot ang inyong mga dalan sa umaabot.

Kon di ka mahimutang nga wa kay uyab, go fot it. Makatabang kini kanimo og dako.

NOY KULAS