Just for a moment
Nagtuo na gyud ko nga di na ko hasulon ni Syrell. Hilom kong nag-ampo nga unta makita ko na ang laki nga true love nako. Pastilan, daghan nang mga lalaki nga akong gipalaom, uy! Nahadlok kog gabaan nila. Apan unsa man sab ning akong kinaiya, uy? Kon dunay lalaki nga mangulitawo nako unya guwapo, madala dayon ko sa akong pagdayeg niya. Sugton dayon nako.
Apan lagi, inig ka ugma buwagan sab dayon nako kay wa na man ko makagusto niya. Mawala na ang pagdayeg ko sa iyang kaguwapo. Morag dali ra kaayo kong sum-olan ba. Aw, mao gyud tingali ni ang bation sa girl nga wa gyuy gugma ngadto sa usa ka lalaki?
Nanglabay ang mga adlaw, wa na gyud mamisita si Syrell nako. Nalipay kaayo ko. Para gud nako, usa ka dakong paghasol nako kon magsige gihapog pangulitawo si Syrell nako nga giprangkahan ko na man siya nga duwa-duwa lang tong pagsugot ko niya.
Usa ka adlaw nga nagpraktis mig sayaw sa gym, namatikdan nako si Joan nga magulanon. Morag wa sa iyang hunhuna ang among pagpraktis. Kanunay siyang masayop. Nakahukom si Joan nga mohunong lang unag praktis. Milingkod siya sa usa ka lugar sa gym. Kanunay kong nagpasiplat niya samtang nagpadayon mig praktis.
Human namog praktis, giduol ko ang akong amiga. “Unsay problema, my friend?” Gikidhatan ko si Joan. Gusto ko siyang lingawon. Aw, klaro man sab nga dunay naghasol niya. Mi-smile si Joan apan kanang pahiyom nga pinugos. Igo lang iyang mitan-aw og kadiyot nako. Milingkod ko tapad ni Joan.
“Tell me, Joan.” Miseryuso ko. Gusto kong ipakita sa akong amiga nga concern ko niya. “Nagsabot baya ta nga way tagoay sa problema?”
Mitan-aw og dugay si Joan nako. Unya miduko siya. Naghilom lang siya.
“Bahin ba dinhi, Joan?” Gitudlo ko ang wala kong dughan, tumong sa akong kasingkaing.
Mitan-aw si Joan nako. Unya hinay siyang mitando.
“Gipangulitawhan ka na ba sa laki nga secret love nimo? Aw, sugta siya. Ayaw pantosa ang imong kaugalingon, uy.”
“Di ingon ana kadali, Aidee. Komplikado ang sitwasyon.”
Wa ko makatingog. Nakatan-aw kog dugay sa akong amiga. Komplikado? Unsa man, minyo ang lalaking gihigugma ni Joan? Hilom kong nakaingon. (SUMPAYAN)