No more drug test sa molukat og lisensya
Mohimo og case briefing ang Office of the Solicitor General (OSG) sa 19th Division sa Court of Appeals dinhi sa Sugbo human gibali ug gipadaplin ang desisyon sa Regional Trial Court sa siyudad sa Toledo kabahin sa pagpahigayon og mandatory drug test sa mga mokuha o mo-renew og driver’s license. Si Victor Emmanuel Caindec, regional director sa Land Transportation Office (LTO) 7, nibutyag nga moanhi sa Sugbo ugma ang representante sa OSG alang sa himuon nga case briefing.
Matod niya, mopagawas og kamandoan si LTO Assistant Secretary Edgar Galvante ug Executive Director Romeo Vera Cruz aron opisyal nga ipahunong na ang pagpahigayon og drug test sa mga molukat o mo-renew sa ilang mga lisensiya.
“So, magbuhat pa sila og order, and then we can take the appropriate actions,” dugang ni Caindec dihang nahinabi sa Superbalita Cebu niadtong Biyernes.
Siya niasoy nga gipahibawo na siya ni Galvante ug Cruz sa maong desisyon sa CA atol sa ilang tigom sa miaging semana, apan nagpaabot pa siya sa opisyal nga kamandoan gikan sa iyang mga labaw.
Sa 19 ka pahina nga desisyon sa 19th Division sa CA Cebu City, kini nibali ug nipadaplin sa naunang desisyon ni Judge Hermes Montero sa Branch 59 sa Toledo City RTC nga nagmando nga ipadayon ang pagpaubos sa mandatory
drug test sa mga mo-renew o molukat og driver’s license.
Bisan kon kini giwagtang na pinaagi sa Republic Act 10586 kun Anti-Drunk and Drugged Driving Act of 2013 nga gipirmahan ni kanhi Presidente
Benigno Aquino III niadtong Mayo 27, 2013.
Nakita sa 19th Division sa CA nga ang mga kamandoan
sa Toledo RTC giisyu “with grave abuse of discretion and are therefore void, all acts emanating from them have no force and effect. The writ of preliminary injunction issued in favor of private respondents, which eventually became permanent in the assailed decision, has no legal effect,” tipik sa decision sa maong division.
Kini nga division gilangkoban nila ni Associate Justices Edgardo Delos Santos,
chairperson sa 19th Division; Louis Acosta ug Edward Contreras.