“Automatic”
Kaniadto “automatic” gani ang istoryahan, makina dayon ang ginahisgotan. Mga pultahan nga moabri lag ilaha. Mga bintana sa auto nga musakag kanaog pinaagi lamang sa pagpislit og butones. Kining “fire alarm” nga motingog tungod sa aso. Moandar lang og ilaha. Karong mga adlawa, “automatic” gani malakip na pod ang atong pagpakighimamat sa internet. Ipaagi lamang og “emoticon” o pagpislit sa “like” o “friend” o “unfriend”, “automatic” na pod ang atong gipasabot. Linaktod na ang atong mga relasyon kay makina na lang ang magsandayong. “Automatic” nga nagkatrato, “automatic” pod nga nanagbuwag. Naa lang kay pisliton mahitabo na dayon.
May “automatic” sa ebanghelyo. Minggawas gyod kining pulonga: “Ang gingharian sa Dios sama sa usa ka tawo nga nagsabod og binhi ngadto sa yuta. Ug natulog ug nagtukaw gabii ug adlaw, ug ang binhi miturok ug mitubo sa paagi nga wala niya mahibaloi. Sa iyang kaugalingon ang yuta mipagula, una sa dahon, dayon sa uhay, dayon sa tibuok lugas diha sa uhay.” Kining “sa iyang kaugalingon” “automatic” diha sa Griyego.
Daw susama ang gihisgotan niini sa mga “automatic” sa kasamtangang panahon. Apan dako ang kalahian. Dili makina kondili kinaiyahan ang gihisgotan. Dili pod tawhanong tuyo ang gipahigayon kondili gingharian sa Dios. Ginoo pod ang nagpaluyo, dili tawo. Binasi sa Ezekiel 17:22-24; Salmo 92;2 Corinto 5:6-10; Marcos 4:26-34 Ang punto: sa katingalahang paagi, “sa iyang kaugalingon,” moturok ug motubo ang gingharian sa Dios! Mao kini ang nahitabo sa unang pundok ni Jesus. Tinukmod sa kasinatian sa Pentekostes, mikuyanap ang sumusunod ni Jesus. Karon kapin sa 2 ka bilyon ang mga Kristohanon kon usa nga ikatulo sa tanang tawo sa kalibutan. Kon subayon nato ang kasaysayan sa Simbahan ni Cristo daghang nahitabo nga daw “automatic”.
Gitandi ni Ezekiel ang pagpasig-uli sa Dios ngadto sa gingharian sa Israel, nga napukan sa Babilonia, sa malumong sanga nga itanom niya sa bungtod sa lugar sa Israel. Modako kini ug mamunga. Nahitabo kini sa pagpabalik ni Ciro, hari sa mga taga Persia, sa Israel sa ilang lugar. Dili kini tungod sa gahum sa mga Israelita. Mosaad gani ang Ginoo, “automatic” nga mahitabo.
“Nagalakaw kami pinaagi sa pagtuo, dili sa makita,” segun ni San Pablo. Daghang pagsulay, hagit, ug kalisdanan ang iyang naagian. Sa tawhanong panglantaw lamang, dugay na unta siya nga napukan ug dili mapadayon ang misyon. Ang grasya sa Dios, maoy nag-abri sa mga dalan ug nagtandog sa mga kasingkasing. “Automatic” pod.
Dili nato paandayonan ang paghari sa teknolohiya sa atong mga relasyon. Kon may “automatic” man gani sa atong kinabuhi, mao kini ang grasya sa Dios nga modan-ag sa atong dalan, molig-on sa atong mga huyang nga lawas ug kalag, ug mopahiluna sa atong kinabuhi padulong sa iyang gingharian.