When summer is gone
Igo na lang kong nangagho nga naghandom kang Israel ug sa nahitabo sa akong gugma tungod sa masakit niyang gibuhat. Gikasilagan ko si Israel. Ug giwakli ko na ang pulong gugma, ug misaad nga di na gyud ko mahigugma pag-usab.
Apan sa among panagkaila ni Raymund, nausab ang dagan sa akong hunahuna. Di diay angay manganti bahin na sa gugma. Di diay angay kasilagan ang gugma, kondi hatagan kini kanunay og lugar sa kasingkasing kay sagrado kini.
Mao kini ang gibati ko kang Raymund. Nahigugma ko kaniya apan sa hilom lang. Kon di pa lang daotan sa usa ka babaye nga maoy mangulitawo sa lalaki, gibuhat ko na kini ngdto kang Raymund. Apan nagtamod ko sa kaligdong sa babaye kon gugma na ang hisgotan. Naghuwat ko nga pangulitawhan ni Raymund. Nabatyagan ko nga malipayon siya ko mag-estorya mi.
Gisabot ko kini nga hilom sab ko niyang gimahal. Nahunahuna nako nga naghuwat lang tingali siya sa hustong higayon aron daygan ko niya sa iyang paghigugma nako.
“You know, Sofia, kon tinuod kong love ang usa ka girl, di ko kini pabayran bisag unsa pa kadako sa kuwarta nga itanyag nako.”
Wa ko itago kang Raymund ang gibuhat ni Israel nako, sa pagbaligya niya sa iyang gugma ngadto sa akong mga ginikanan. Anak ko sa magtiayon nga mga agalon ni Israel. Hatod kuha niya sila sa Papa ug Mama sa opisina. Parehas nga presidente sa tagsa-tagsa ka kompaniya ang akong mga ginikanan nga ilang gitrabahoan.
Nahigugma ko kang Israel. Dihang nangulitawo siya nako, wa ko siya paantosa. Gisugot dayon nako siya. Mituo ko sa mga saad ni Israel nga mahalon ko niya hangtod sa kahangtoran. Nalipay ko. Apan bakakon diay siyang dako. Dihang nahibaw-an nila ni Mama ug Papa ang among relasyon ni Israel, gihatagan nila og dakong kantidad ang akong boyfriend aron magpahilayo siya nako, ug di na gyud magpakita nako bisan kanus-a pa.
“Pero si Israel, Ray, way dugokan, way baroganan. Huyang bahin sa kuwarta. Importante ang kuwarta niya kay sa iyang gugma nako.”
“Wa siyay gugma nimo, Sofia. Kon nahigugma pa siya nimo, di niya dawaton ang kuwarta nga gihatag sa imong parents kaniya.” Mitando na lang ko.