Rehab center tukoron sa Cebu City
Plano sa Cebu City Office for Substance Abuse Prevention (Cosap) nga magtukod og kaugalingong rehabilitation facility ang dakbayan subay niining nagkadako nga programa sa ilang Community-Based Rehabilitation Treatment and After Care.
Matod ni Cosap executive director Garry Lao nga giaprobahan na ni Cebu City Mayor Tomas Osmeña ang iyang gusto apan nagpabilin pa kini nga plano sapagkakaron.
Ubos sa rehab treatment program sa Cosap, ang mga low ug moderate risk lang nga mga surrenderer ang ilang matabangan ug kadtong high risk o taas ang tolerance level sa drugas, kinahanglan nila i-refer sa mga rehab center sa Sugbo apan sagad niini puno.
Ang community-based treatment sa Cosap, adunay 17 ka barangay nga naghimo niini diin niabot na usab sa 257 ka mga surrenderer ang nagpa-enroll sukad Abril niadtong nakalabay nga tuig hangtod Hunyo ning tuiga.
“In the start of the new administration at the barangay level by July, the office of Cosap will strengthen and revitalize our Community Rehabilitation Program for our surrenderers in all 80 barangays in line with the future plan to build a city’s rehabilitation facility,” tipik sa suwat ni Lao kang Osmeña.
Dugang ni Lao nga gusto niya sa bukirang bahin tukoron ang rehab facility aron mahilayo sa tentasyon sa siyudad.
Sapagkakaron, ang CBT sa Cosap gihimo sa nagkadaiyang barangay diin kausa kini sa usa ka semana.
Di usab kini pinugos tungod kay kadtong lang andam mosud sa ilang programa ang ilang tabangan.