14 JO sa Talisay positibo sa drug test

Moabot na ngadto sa 14 ka tawo gikan sa 659 ka empleyado sa City Hall sa dakbayan sa Talisay ang nagpositibo sa drug testing nga gisugdan niadtong Martes hangtud kagahapong adlawa.

Ang mga gipaubos sa drug test mao ang mga job order ( JO) nga empleyado sa Talisay ug gisugdan niadtong Martes ug mahuman inig Byernes.

Mao kini ang ikaduhang higayun karung tuiga diin mipahigayun silag drug test ngadto sa ilang mga empleyado. Gullas

Una nila kining gibuhat niadtong Pebrero diin unom sa 81 ka empleyado ang nagpositibo sa drug test.

Niadtong miaging tuig unom sab ang nagpositibo sa ilang gihimong drug test ngadto sa 74 nila ka mga empleyado.

Si Emely Cabrera, Human Resource Division head sa Talisay City, miingon nga ang pagpahigayon og drug test ngadto sa mga empleyado, ilang basihanan kun kini nga mga empleyado, mamahimo pa bang makatrabaho sa buwan sa Hulyo.

Matod ni Cabrera nga ang mga magpositibo sa drug test, ipaubos nila sa After Care Program nga ghimo sa dakbayan sa Talisay.

Adunay 1200 ka mga empyeado ang gikatagdang moapil sa drug testing nga gipahigayon karon sa Talisay City Health Office.

Si Talisay City Mayor Eduardo Gullas nga nahinabi ning mantalaan, una nang miingon nga uyon siya nga ipaubos sa drug test ang tanan emplyado sa dakbayan sa Talisay.

Dugang niya nga dapat way pilion sa kun kinsa lang ang ipaubos sa drug test.

Nitataw siya nga lakip na sa ipaubos sa drug test mao ang mayor, bise-mayor ug ngadto na sa mga konsehal.

“We should have a drug test for all. Dapat way exception,” matod niya. /