2 ang pamilya

Dear Noy Kulas,

Maayong adlaw. Naa ko diri sa abroad dugay na. Minyo ko diha sa atoa pero minyo sab ko diri sa akong gitrabahoan.

Taudtaud na kong naminyo diri ug duna na koy usa ka anak samtang duha pud ang akoa nga naa diha. Nauyab ni nako ang akong asawa diri ug naka decide ming magminyo kay nimabdos na siya human sa pila ka buwan nga nagpuyo mi.

Wa pa makahibawo ang akong asawa diha kay wa may putol ang akong padala pero nahibung siya kay five years na kong wa makauli diha. Di man mosugot ang akong asawa diri nga mopauli ko bisan nakahibawo siyang naa koy pamilya diha.

Kon makauli ko, tug-anan ba nako ang akong asawa nga naa koy laing misis sa abroad? Di ba ko mapriso diha kon mahibawo na ang akong asawa? Di ba kaha ko patyon sa iyang pamilya sa kalagot kon makahibawo sila? Di na ko makatalikod sa responsibility sa akong asawa diri ug anak. Mangayo na lang ko og guidance nimo, Noy Kulas.

LITO

Lit,

Tug-ani ang imong asawa sa imong sitwasyon ug dawata kon masuko siya. Posibleng makigbuwag siya nimo tungod sa imong gibuhat. Way asawa nga malipay sa sinugdan kon luiban na sa ilang kapikas. Apan dunay mga kaso nga akong nasugatan nga susama sa imoha, napasaylo ra sa misis kay nipatigbabaw ang gugma. Apan nilanat una og pipila ka katuigan una pa naulian ang asawa.

Naa gani kaso, diin ang asawa nakahibawo. Iya pang giila-ila ang mga anak ug siya maoy nag-introduce sa mga anak sa iyang bana sa laing babaye ngadto sa ilang mga anak. Matod niya nga nipatigbabaw ang iyang gugma sa iyang bana ug ngadto sa mga anak sa gawas. Di niya maapil sa kasuko ang mga bata kay di kini mao ang nakasala. Maanindot kon mao ni ang mahitabo. But as human as we are, expect a war. But imo na man nang gisudlan, barugi na.Ayaw pagtinalawan. Atubanga ang bisan unsa ang linugdangan.

NOY KULAS