Neither one of us
Nagkatinan-Away mi si Bonna. Morag nagkaparehas ang among hunahuna. Gusto namong duulon si Rommel nga nag-inusarang nag-esnak sa usa ka snack bar. “Tana, Mayeen.”
Dali ra kong nakatando. “Sige.”Apan dihang moduol na unta mi si Bonna kang Rommel, dunay nahiabot nga babaye ug lalaki ug miduol kang Rommel. Milingkod dayon ang duha sa atbang ni Rommel. Nag-aper silang tulo. Klaro nga malipayon silang nag-estoryahay.Wa na lang mi modayon si Bonna sa pagduol kang Rommel.
“Amigo ug amiga na ni Rommel. Di nato sila samukon, Bon.”“Bitaw Mayeen.”
Wa dayon ko makatulog anang gabhiona. Si Rommel ra gyud ang kanunay kong gihunahuna. Usahay mahunahuna ko kadtong lalaki ug babaye nga miduol kang Rommel. Morag dugay na silang managkailang tulo. Guwapo ra ba sab tong lalaki, ug guwapa sab ang babaye. Puparehas lang silag edad namo ni Bonna ug Rommel. Nagtuo ko nga managhigugmaay kadtong lalaki ug babaye kay nag-holding hands man sila sa pagduol kang Rommel.
“Haayyy! Kanindot kaha kon boyfriend ko na si Rommel.”
Hilom kong nangandoy. Unya nakatulog ko nga nagpahiyom. Unsaon, nga bisan sa akong pagkatulog naghunahuna man ko nga nagminahalay na mi si Rommel.
Sus, sa among pagkita ni Bonna anang pagka ugma, iyang gisulti nako nga kada gabii sa dayon na niyang katulog, maoy iyang hunahunaon nga boyfriend niya si Rommel. Nagkinataw-anay na lang mi kay nagkaparehas gyud ang among hunahuna ug pangandoy.
“Seguradong sakitan ko, Mayeen, kon ikaw ang higugmaon ni Rommel. Pero sa laing bahin malipay sab ko kay napunta ka niya ug wa ngadto sa laing girl.”
“Mao sab ko, Bonna. Sakit gyud para nako kon ikaw ang iyang love. Pero mao lagi, malipay sab ko kay ikaw ang makatag-iya niya. But maghuwat lang gyud ta kon kinsay pangulitawhan ni Rommel.”
“Bitaw. Only time can tell kon kinsa gyud nato ang love ni Rommel, Mayeen.”
Usa ka hapon nga nag-window shopping mi si Bonna, gikan mi sa eskol ug wa modiretso sa pagpauli, nakita namo si Rommel nga nagtindog sa gawas sa Mall, morag duna siyay gihuwat. Unya dunay nahiabot nga lalaki ug miduol dayon kang Rommel. Nagaper silang duha. Malipayon kaayo sila.Nagkatinan-away mi si Bonna.
(SUMPAYAN)