TALLO SUSPENSO
Mga duwa karon
5:15 pm- USPF batok USC ( jrs)
6:45 pm- CEC batok USJR ( jrs)
8:15 pm- UV batok USPF (srs)
Human sa ilang gihimong imbestigasyon, ang Cebu Schools Athletic Foundation Inc. (CESAFI) mibuhi’g desisyon nga suspensuhon si Cebu Eastern College (CEC) Dragons assistant coach Mark Anthony Tallo sa tanang nahabiling mga duwa sa 2018 Partner’s Cup.
Kini human napamatud-an sa CESAFI nga gibaharan ug gihagit og sumbagay ni Tallo sa gawas korte ang referee nga si Herbert Rosal atol sa kulbahinam nga duwa sa CEC ug University of San Carlos (USC) Baby Warriors diin mingdaog ang Dragons, 71-68, niadtong Hunyo 21.
Adunay komosyon nga nahitabo dihang gitawagan si Tallo og technical foul ni Rosal gumikan sa grabeng pagreklamo sa 3rd quarter.
Basi sa imbestigasyon, nagpadayon si Tallo og reklamo hinungdan nga natawagan kini’g balik og technical foul ni Rosal nga nagpasabot og ejection. “After ato, akong giingnan
ang referee nga maghatag og
report ni commissioner (Felix) Tiukinhoy. Ato nga time, mura’g naa man sa Vietnam si Tiukinhoy ug gahapon lang naabot,” matod ni assistant commissioner Danny Duran.
Gawas sa suspensyon, si Tallo pamultahon sab og P5,000 ug dugang upat ka mga oras nga community service. “The Commissioner found coach Mark Tallo guilty of threatening the referee Herbert Rosal to box him outside
the court,” tipik sa opisyal nga pamahayag sa CESAFI.
Si Tallo gisuwayan pagkontak ning mantalaan aron kuhaan unta sa iyang opinyon apan pakyas. Ang Dragons kasamtangang naggunit og 1-3 nga rekord sa
high school division ug aduna pa’y nahabiling duha ka mga duwa sa elimination round.
Si Tallo dili na makatunga sa duwa sa Dragons sa ikaduhang duwa karong hapon batok sa University of San Jose Recoletos (USJ-R) Baby Jaguars sa pagpadayon sa aksyon sa Partner’s Cup sa Cebu Coliseum.
Sa laing duwa sa high school division, mag-abot ang USC Baby Warriors ug University of Southern Philippines Foundation (USPF) Baby Panthers sugod sa alas 5:15 sa hapon.
Sa main game, magpinaksitay ang parehong wala’y pilde sa college division nga mao ang USPF Panthers ug University of the Visayas (UV) Green Lancers. Ang Panthers ug Green Lancers pulos naghupot og 3-0 nga rekord.