Messi, Argentina sud sa knockout stages
Nakataak si Lionel Messi ug ang Argentina sa knockout stages human nila gipalagpot ang Nigeria, 2-1, kagahapon sa World Cup sa St. Peterburg, Russia.
Ang goal ni defender Marcos Rojo sa ika-86 nga minutos mao ang nakapadaog sa Argentina, nga nakig-uban sa Croatia isip qualifier gikan sa group D.
Ang Croatia nakaabante sa round-of-16 pinaagi sa 2-1 sab nga kadaugan batok sa Iceland.
Ang Argentina, nga kaduha na ningkampiyon ning pretihiyusong kompetisyon, makigbatok sa France sa round-of-16 samtang ang Croatia makigharong sa Denmark.
Si Mesi maoy nakahatag sa Argentina og 1-0 nga labaw pinaagi sa iyang goal sa ika-14 ka mga minutos.
Nakatabla ang Nigeria sa ika-56 nga minutos pinaagi sa penalty kick ni Victor Moses.
Human niini, ang duha ka mga kampo parehong naglisod pagpasulod sa ilang ataki hangtod nga nakatayming si Rojo sa iyang antimanong strike nga nakapabilib kang Messi.
“We already knew we were going to win, we were confident that God would help us, that all would turn out well,” matod ni Messi.
“But we didn’t expect the complication of the draw, of suffering so much. What’s important is that we went through.”
Adunay pipila ka mga oportunidad ang Nigeria nga makatabla unta sa duwa nga makatukmod kanila sa knockouts stages apan wala kini nila napahimuslan.
Napungot sab ang Nigeria nga wala sila mahatagi sa video assistant referee (VAR) review og penalty alang unta sa posibleng handball ni Rojo.