Magic modani og superstars alang sa Lakers
Gisugal ni baskletball legend Magic Johnson ang iya mismong trabaho kabahin sa iyang tinguha nga makadani og dekalidad nga mga magduduwa alang sa Los Angeles Lakers sa umaabot nga free agency sa National Basketball Association (NBA).
Nagkanayon si Johnson nga moretiro siya isip Lakers president of basketball operations kon dili kini niya mahimo sa magsunod duha ka offseason.
“Next summer, if nobody comes and I’m still sitting here like this, then it’s a failure,” matod ni Johnson.
Mismong ang tag-iya sa Lakers nga si Jeanie Buss ang naghatag kang Johnson sa iyang kasamtangang trabaho niadtong Pebrero sa miaging tuig ug dihadiha dayon, misaad ang kanhi superstar pointguard nga iyang ibalik ang himaya sa 16-time champions.
Ning maong offseason, anaa sila si Paul George sa Oklahoma City Thunder, Kawhi Leonard sa San Antonio Spurs ug LeBron James sa Cleveland Cavaliers nga puwedeng pangulitawhan sa Lakers.
Kon mapakyas ang Lakers sa paghaylo bisan usa sa mga nangahisgutan, hayan matod ni Johnson nga manimpalad siya 2019 free agents.
“Like I told you when I took the job, it’s going to be a two-summer thing for the Lakers,” asoy ni Johnson.
“This summer, and next summer, and that’s it. And if I can’t deliver, I’m going to step down myself. She won’t have to fire me. I’ll step away from it. Because then, I can’t do this job. But so far, so good.”
Ang Lakers hinayhinay nang nagpalig-on sa kinauyokan sa batan-on nilang puwersa nga gilangkuban nila ni Brandon Ingram, Lonzo Ball, Kyle Kuzma ug Josh Hart.
Kon makakuha lang siya og dekalidad nga magduduwa nga makapangulo sa batan-ong mga pambato sa Lakers, nagtuo si Johnson nga puwede na silang makaparang og sakto sa labing lig-ong teams sa liga.
“I’m Magic Johnson. You know how many finals I’ve been in? So you think I’m worried about this? I played against Larry Bird in the Finals. I played in nine Finals,” dugang sa malaumong si Johnson.