DURANT MOAPIL SA FREE AGENCY
Molugnot si Kevin Durant sa iyang kontrata sa National Basketball Association (NBA) back-to-back champions Golden State Warriors aron mosulod sa free agency. Ang kasamtangang NBA Finals MVP mipirma sa Warriors og duha ka mga tuig nga kontrata niadtong summer nga nagbalor og $51 million diin nahilakip sa kasabutan nga aduna siya’y opsyon nga molugnot sa ikaduhang tuig. Gamiton ni Durant ang maong opsyon aron mahimong free agent apan giklaro sa kanhi regular season MVP nga wala siya’y planong mobalhin og laing team.
Buhaton lang kini ni Durant aron makignegusasyon og bag-ong kontrata sa Warriors alang mas dako nga suweldo nga daan nang giuyonan sa team management.
Sa sayo pa, ang management ningpabuhagay nang daan nga “sangko sa langit” ang puwede nilang itanyag kang Durant.
“Sometimes you don’t negotiate,” matod ni general manager Bob Myers. “I’d love to have him for 10 years. Kevin Durant, look what he did for us last year, he did us a great service (taking less than a max offer). He’s earned the right to sign whatever deal he wants.”
Gipasabot ni Myers nga ang ilang intensyon nga ipabiling solido ang ilang kasamtangang puwersa ug kon mahimo lang, wala’y mawagtang bisan usa lang ka piyesa hilabi na ang sama og kalidad ni Durant.
“I just want him to sign a deal. But want him to be happy and want him to know that we want him as long as he wants to be here,” dugang ni Myers.
“He’s earned that, to kind of lay out the terms. He can do whatever he wants. That shouldn’t be a long negotiation. Our goal, to be honest, is to try to keep the whole thing together, so that’s the pieces of the puzzle we’ve got to try to figure out.”
Sa miaging offseason, si Durant midawat og suweldo nga kuwang og $10 million sa maximum nga angayan untang madawat sa 6’10 All-Star forward aron lang makasulod sa puwersa sa Warriors.
Kinahanglang mosakripisyo si Durant niadtong higayuna aron makapirma og balik sa Warriors sila si Andre Iguodala ug Shaun Livingston, nga pulos importanteng mga piyesa sa puwersa sa gikonsiderar nga Super Team.
Sa 2017-18 season, si Durant nag-average og 26.4 puntos, 6.8 rebounds, ug 5.4 assists sa regular season. Sa playoffs, ningsaka ang mga numero ni Durant ug miposte kini’g averages nga 29.0 points, 7.8 rebounds ug 4.7 assists aron tabangan ang Warriors nga malangkat ang ikatulo niining kampiyunato sulod sa upat ka mga tuig.
Gilauman nga ang pirmahan ni Durant sa iyang pagpabilin sa Warriors mao na ang maximum contract nga nagbalor og $158 million sulod sa upat ka mga tuig.
Gilaumang mahimo nang pinal ang tanyag sa Warriors ngadto kang Durant sa umaabot lang nga mga adlaw.